Read Galela RUM 7 Bible Online

RUM 7 - Galela bible

RUM 7

¹Ikii ewo, mee? ei, noogeimaido, (ani dijo douja mana kodo epi bageepa etii kouja), me idaana ija toja gaa to dijo douja mana kodo okai maida bida.

²Dijo douja mana kodaa wakaago jagamo kodo jameme maida tawadoke, jameme kidi ija toja gaa; kodeja jameme boka-toojogo, jameme maida dijo douja mana kodo maida make pipikadoke.

³Okai kouja, jameme kidi toojogo gaa kodaa, jagamo kodo me inoopa uwi-toojogo ko, okai mogai jago jagamo eebatai. Kodeja jameme boka-toojogo ko, kou mana maida make pipikadoke tijake me inoopa uwi-toojogo ko mogai ko beu.

⁴Okai kou dani maija, ei, noogeimaido, Keristusja má jatouga ikii dijo douja mana maida make bokai, me ino ipuwe ke-tijake, kii ke bokata bagee jupi make eenigojawita me kidi, Ugatame maida make uta go-tijake.

⁵Inii me ijeida ume-wo tei tita gaa kodaa, dijo douja mana kodaa iniija peu kibigi dimi kodo mabiki atijake iniija tineija duba wo kei tijake bokauta go-wo tita.

⁶Kodeja ito kou inii dijo douja mana maida make nipipikajawijake bida peu nijakimakita mana kodo maida make bokata; tijake inii ija manaida rohdaiga dijo do-wo, doga ka ebaidaiga mana ko beu.

⁷Kojoka inii ito kou kawe dani mana wegai? Dijo douja mana kou ko peu, mee? Umina ko beu! Dijo douja mana beu naako, ani peu kodo ewo ga-toja. Dijo douja mana kodaa „Kibigi te tai” enii beu naako, ani kibigi kodo ewo ga-toja.

⁸Kodeja peu kodo nitimakita mana ka mabiki atijake ani duba kii kibigi kou kibigi kei tigoo. Dijo douja mana beuda ko, peu kodo boka-tou.

⁹Ani mijaato dijo douja mana beuda ija tou, kodeja nitimakita mana kodo mejake peu kodo ija kijake ani bokai.

¹⁰Tijake ajii natijawiine ka nitimakita mana kodaa nabokajawii.

¹¹Nitimakita mana kodaa peu kodo mabiki atijake peu kodaa puja naukijake, koudaiga nabokajawii.

¹²Kojoka dijo douja mana kou ko jimubeu kodo, daana nitimakita mana kou ko jimubeu ma, maakodo ma, enauto ma.

¹³Kou dani keetigo ko, enaa agijo kodaa nabokajawii, mee? Umina ko beu! Kodeja peu kodo peu kojoka ewaida ke-tijake enaa manaidaiga ani duba bokai mana naamejawii, nitimakita manaidaiga peu ko ibo umina kodo ewaida ke-tita.

¹⁴Inii epi kouja, dijo douja mana kou ko roh bokouto kodo, kodeja ani ki me má topa kii ko, peu maida naakegajawita.

¹⁵Ani kidaa kei tai agijo ani gai beu; ani ide agijo kei tai beu kouja, kodeja ani be gai agijo kei te-tai.

¹⁶Kodeja ani be gai agijo kei tipa ko, dijo douja mana kou ko enaa kojoka ani wegai.

¹⁷Kojoka ani kidaa kei tai ko beu, kodeja ani duba ka peu kodaa.

¹⁸Ani duba enaa agijo tou beu kojoka gajake, ani ma maida no te. Enaa agijo kei taine tijake dimi kodo tou, kodeja te kei timake.

¹⁹Ani enaa agijo kei taine gajake te kei tai kouja, kodeja peu agijo be gajake ko kei tai.

²⁰Kodeja ani be gata agijo kodo kei tipa ko, ani kidaa kei tai ko beu, kodeja ani duba ka peu kodaa kei tai.

²¹Kojoka kou ijee kodo ani dou: ani enaa agijo kei taine jato peu kodo aneepa tou.

²²Ani tugo jato ani Ugatameja dijo douja mana kodo ide,

²³kodeja ani tineija duba joko ka ijee kodo ani dou, anija dimi ka dijo doune mana kodo ma akaije, tijake ani tineija duba ka peu kodaa bida peu najakimakai.

²⁴Jee! Ani peu kita me no! Meija kii bokata má kidi maida make napipikajawija?

²⁵Ugatame muta etuwai, Jesus Keristus kidi maidaiga, e boko te boko nijaduwa-tai me kidi. Kou dani tijake ani kidaa dimi ka Ugatameja dijo douja mana kodo dijo jadou, kodeja me ijeida kodaa peu kodaa najakimakita.