Read Galela RUM 8 Bible Online

RUM 8 - Galela bible

RUM 8

¹Okai kouja Keristus Jesus duba ka bagee maida peu eewii mana tou beu.

²Roh ka ijee kodaa, kou ko Keristus Jesus duba ka ajii bokouto kodaa peu ma bokai ma ijee maida make napipikajawita.

³Musaja dijo douja mana kodo me ijeida kogaagije kouja te kei timakija mana kou ko Ugatame kidaa kei tita; peu me ka epoudaiga daana peu maida make Jokame didé kidi ebadikumijake me ijeidaiga peu kodo peu eewii.

⁴Musaja dijo douja manaida ka enaa enimakita mana kodo inii duba boko duwajawe-tita, inii me ijeidaiga ume-wo beu tijake Rohdaiga ume-wo bagee kede.

⁵Me ijeidaiga ume-wo bagee kede me ijeida ka manaido dimi to ga-wo, kodeja Rohdaiga ume-wo bagee kede Roh manaido dimi ga-wo.

⁶Me ijeida ga-wo kou ko bokai mana kouja; kodeja Roh manaida dimi ga-wo kou ko ajii tai ma, muka-muka ma.

⁷Me ijeida dimi ga-wo kou ko Ugatame ma jape kouja; okai Ugatameja dijo douja mana kodo ejuwidoke beu; beu maa, te juwimake.

⁸Daana me ijeidaiga uwe-wo bagee kede Ugatameja juma dege-dege te etimakija.

⁹Kodeja ikii ke me ijeida tou beu, kodeja Rohdaiga topa, kou danite Ugatameja Roh kodo ikii duba topa ko. Meija Keristusja Roh kodo taawipi ko, okai ipuwe ko beu.

¹⁰Kodeja Keristus ikii duba topi ko, peu maida make má jato kodo bokai kodeja, roh kodo maakodo bokouto maida make ajii tai.

¹¹Jesus bokata bagee jupi make eenigojawita me kidi Roh kodo ikii duba topa ko, Keristus Jesus bokata bagee jupi make eenigojawita me kidaa ikiija ka peu kija má kodo maija ija keewiitagi, okaija Roh kodoudaiga, ikii duba topa kodaa.

¹²Okai kouja, ei, noogeimaido, inii ebé tope, me ijeida ko beu, me ijeidaiga ume-wo te taine tijake,

¹³ikii me ijeidaiga ume-wo tipa ikii bokaita kouja, kodeja ikii Rohdaiga me ijeida kei te-tai manaido kodo bokajawipa ko, ikii ajii taita.

¹⁴Ugatameja Roh ka migougu jamakita bagee kede Ugatame jokaaneido kede.

¹⁵Ikii bida peu kijakimakijake weda dimi kodo go-motii ko beu kouja, kodeja kibuki-motita jokaane dimi kodo; inii kou dimiidaiga „Ei, Naitai”, manaa-tai.

¹⁶Roh kodaa iniija ka roh ma mana nijawegai, inii ke Ugatame jokaane kede ke mana kodo.

¹⁷Inii okai jokaane keetigo ko, okaapa make gowaja bagee kede maija, kou ko, Ugatameepa make gowai kodo, daana Keristus ma enaimo oogowai; inii okai ma enaimo didi oogaduwa-toojogo ko, okai ma enaimo ajiipi oogo-tita.

¹⁸Anija gai ko, wadaato ajiipi ewaida nijaawii kou ko ito wagi ka didi gaduwai kodo ma akanawa te tija.

¹⁹Ugata aagijo taagijouja didi gajake Ugatame jokaane ewaida awii mana kodo douto-tai.

²⁰Ugata aagijo taagijouja wogidaa manaida tagi atita, okai kidaa dimiidaiga ko beu, kodeja etagimijawita me kidaa dimiidaiga; kodeja dimi kotopijawijake maija,

²¹ugata aagijo taagijouja peu kai maida make pipikadaa taitai, tijake Ugatame jokaane kede jegeenaka pipikadaida kodaa wadoujo kai.

²²Inii epi ugata aagijo taagijouja kodo ito to utuuja kuni kani tijake gaduwagoo to tai;

²³daana ugata aagijo taagijouja to ko beu, kodeja inii kede maija, Roh ookajawii uta kodo gojawii bagee kede, inii tugo jato kuni kani teete, okai jokaane nibuke-tijake inii doutope gaa, iniija má jato nipipikajawii mana kodo no te.

²⁴Kotopijawita dimiidaiga inii ajii bokouto nijaduwajawita kouja. Kodeja dimi kotopijawita agijo kodo do-toojogo ko, kou ko dimi kotopijawii ko beu; me ka dota agijo kou ko magijo ka dimi kotopijawii?

²⁵Kodeja inii dou beu agijo kodo dimi kotopijawi-toojogo ko, inii kegepa animakijake doutou to tai.

²⁶Kou danite maija Roh kodaa iniija kogaagije kodo needadi-motii. Inii sembahjang tija takaida ka sembahjang tai ko ewo kouja; kodeja Roh kodaa kuni kani wegai ma peu kodo nijaediimai.

²⁷Me ka kegepa igi jake-tai me kidi Roh ka dimi kodo epi; Roh kodaa Ugatameja dimiidaiga jimubeu bagee maida make jaediimai kouja.

²⁸Inii epi utoma agijo utoma enaimo kei tijawijake enaa agijo jamejawii, Ugatame ei egai bageepa, kou ko, okaija gata dimi epeepeidaiga manaa-tita bagee kede.

²⁹Okai tika kodaa egata bagee kede Jokame kidi ijeidaiga ke-tijake tika kodaa boko jaduwajawita; enakeneka bagee wedaba jupi ibome kidi ke-tita.

³⁰Daana tika kodaa boko jaduwajawita bagee kede okai manaa-tita; daana manaa-tita daniido kede okai maa eewita; daana maa eewita kede ajiipi etijawita.

³¹Okai kou mana maida make inii kawe dani mana wegaja? Ugatame kidi inii jatouga keetigo ko, meija akaije nitija?

³²Jokame didé ejakimakai beu tijake inii utoma maida make eekegajawita me kidaa, beu, mee? okai ma enaimo utoma agijo utoma niimaitagi.

³³Meija Ugatameja ewitokita bagee kede ijeije etija? Ugatame kidaa maa eewii.

³⁴Meija peu eewija? Keristus Jesus kidi bokata, beu maa, eenigojawita; okai Ugatameja etikaato gebo topi; nijaediimeete topi.

³⁵Meija Keristusja ipa dimi maida make akawude nitijawija? Gaagaa juwa, didi juwa, peepu juwa, naidi juwa, agijo tagu juwa, peu kaine ijeida juwa, jape juwa;

³⁶kapogeije ebijamakita kodo danite: Aki maida make inii agape woja kodo nigigoo to; Ogo duwaja ka domba danite nigata.

³⁷Kodeja kei manaido utoma duba inii petee ke-wo, ipa nigata me kidiidaiga.

³⁸Ani dimi epaapa timakai kouja, bokai juwa, umi-tou juwa, jaetigo-tai bagee juwa, boko duwa-tai juwa, topai agijo juwa, meitai agijo juwa, bida agijo juwa,

³⁹waikaato ka juwa, wakaato ka juwa, ugata agijo tumaana ma juwa, Ugatameja ipa bokouto maida make ko okaakai ti nitijawimake, Keristus Jesus duba kodaa, e boko te boko nijaduwa-tai me kidi.