Read Galela RUM 9 Bible Online

RUM 9 - Galela bible

RUM 9

¹Ani Keristus pekaida maakodo kitii, ani puja beu. Anija dimi kodaa maija mana naawegai Rohulkudus duba,

²ani didi umina gajake kegepa duba gaagaa te duwamake.

³Ani ki peu dokidoke tijake Keristus maida make akawude na enaa kodaa, ani ma bagee maida make, ani tine kede.

⁴Kou ko Israil tuma no te, ebukita jokaane mana kou ko okei ipuwe; daana ajiipi bokouto ma, jadokijawita manaido ma, dijo douja mana kodo ma, Ugatame migaakobe etija takaida ma, jatogijawita manaido ma, okei ipuwe.

⁵Tikauwa ka iboudo kede okei ipuwe; daana me má jatouga Keristus kidi okei epaidaiga meta, utoma bagee wado etige kidi, Ugatame muta etuwaja kidi, kii kidi imo to togoo. Amin.

⁶Kodeja Ugatameja mana kodo wogidaa ko beu; Israil epauto bagee utoma ko Israil ko beu kouja.

⁷Daana Ibrahimja ekebata bagee utoma kede okaija jokaane ko beu. Kodeja „Aki ijoo eebatijawii kou ko Isak epaidaiga.”

⁸Boko jato ko: Ugatame jokaane mana kou ko me má jatouga mana ko beu, kodeja togijawita manaida ka jokaane kei ke okaija ijoo kodo egajawita.

⁹Togijawita mana kodo kou dani kouja: Okai kii gaa kidi dani ani joko mejake Sarah ko jame joka paita.

¹⁰Daana kou dani to ko beu, kodeja Rebeka maija me idaana ka modo kijake, kii ke iniija aija Isak kidi,

¹¹jokaija kei pai beu gaa kodaa, daana enaa agijo juwa, peu agijo juwa, aakei tai beu gaa, (Ugatameja tota dimi kodo pigu tijake to-tita,

¹²kou ko, me ka kei tita agijo maida make ko beu, kodeja Ugatameja manaa-tita maida make ko), tijake kou dani Rebeka kodoopa etita mana ko: Ibome kidaa wenekame jakei taitagi.

¹³Kapogeije ebijamakita kodo danite: Jakub ani ipa egata, kodeja Esau ani be egata.

¹⁴Kojoka inii kawe dani mana wegai? Ugatame kidi utoopa dimi, mee? Umina ko beu!

¹⁵Okai Musaapa etita mana kouja: Ani kojáá etai me kidi ani kojáá etaita, daana ani ipa egai me kidi ani ipa egaita.

¹⁶Kou dani tijake me ka gaja dimi juwa, ekowaja juwa, maida epijadoke beu, kodeja Ugatameja ipa dimi maida kodaa.

¹⁷Ugata mana kodo Piraonpa etita mana kouja: Okai kou maida make ani ewaa kaaweega, anija bida bokouto kodo aki duba emuwakaine tijake, aneeka kodo uwoje makije ugo uwikumiine tijake.

¹⁸Kou dani tijake Ugatameja egata bagee kede ipa egai, daana okaija egata bagee kede kegepa bida eewii.

¹⁹Ito kou aki kii dani eniipage juwa: Magijo taine tijake okai peu nigai? Meija okaija dimi kodo akaije ootimake?

²⁰Ei, me ki, aki ki meime? Ugatameepa wo etiine. Ebijata agijo kodaa ebijata meepa, „Aki magijo ka kou dani naabijai?” wo etija, mee?

²¹Tapuja ebija-tai me kidi daki maida bida beu, mee? kemoona ka to diiti tapuja ma, utoopa tapuja ma ebijai kodo.

²²Kawe dani ko, Ugatameja emoge kodo ma, bida bokouto kodo ma, okai ewaida awii beu kai peu kodeja, emoge maida make ka tapuja peu kaine ka kodo, okai kegepa animakijake dokigoo to ti-toojogo.

²³Tijake ipa egata ka tapuja kodo maida okaija ugo uweuwe ka ipa bokouto kodo emuwake-tita; ajiipi bokouto go-mote-tijake tika kodaa make boko jaduwajawita,

²⁴kou ko, inii ke, okaija mana nitita bagee kede, Jahudi ka to ko beu, kodeja ojaa bagee kede maija.

²⁵Okai Hosea kapogeije duba kei tita mana kodo danite: Anija uguupuguu beu bagee kede ke anija uguupuguu eebataita, Daana ipa egai beu ka kede anija ipa egai ka kede eebataita.

²⁶Tijake „Ikii ke anija uguupuguu ko beu” etitaida kodaa, okai kou gaa kodaa ajii bokouto jago Ugatame kidaa jokaane kede ke eebataitai.

²⁷Jesajaja Israil maida make pitokita mana ko: Israil bagee kede maikai watija ka I kodo dani bukaa keetigo maija, jaikitaija kede to ajii taitai.

²⁸Tuhan kidaa bida peu kidi egaa kodaa makiida maki utoma boko petaitagi kouja.

²⁹Jesaja tika kodaa wegata kodo danite: Tuhan, e boko te boko duwa-tai me kidi inii ijoo nijajaikai beu naako, inii Sodom ma, Gomora ma dani bukaa ki-toja.

³⁰Kojoka inii kawe dani wegai? Ojaa bagee kede maakodo bokouto juma doodoo beu bagee kede maakodo bokouto kodo go-motita; kou ko, maakodo gaidaiga ka maakodo bokouto kodo no te.

³¹Kodeja Israil kede, dijo douja ka maakodo bokouto juma doodoo tita kede dijo douja mana kodo dijo domakai beu tita.

³²Má takaida ka? Okei maakodo gaidaiga juma doodoo beu kouja, kodeja okei kede kei titaidaiga jaijo. Tijake taku tuwai mogo maida konepei tidaa tita.

³³Kapogeije kodo ebijamakita danite: Domidou, ani Sion makiida me tokoo tija mogo makijawii; Daana kou maida jagii tija mogouto. Daana meija maakodo egapi ego te gaitagi.