Read Galela 1 KORINTUS 11 Bible Online

1 KORINTUS 11 - Galela bible

1 KORINTUS 11

¹Ikii anija ijee naapei, ani na Keristus eepeiga danite.

²Ani muta kituwai, ikii utoma manaido duba naga-tou kouja, daana anija dijo dou kitita manaido ikii bida peu jakimakai kouja, anija kiti-kinita danite.

³Kodeja ani ide ikii gai, jame ka migougu ki Keristus kidi, daana jagamo ka migougu ki jameme kidi, daana Keristusja migougu kidi ki Ugatame.

⁴Jame idaana migo egaupijake sembahjang juwa, mana wudii juwa tipi, migo peu awii.

⁵Kodeja jagamo idaana migo te egaupijake sembahjang juwa, mana wudii juwa tipa, migo peu awii, okai idaa to pou atii danite kouja.

⁶Jagamo idaana te egaupi-toojogo, ijo bugii na enaa. Kou danite jagamo ka ijo bugii juwa, idaa to pou atii juwa, ego gatoojogo, egaupai kodo ko.

⁷Jame kidi migo te egaupija, okai Ugatameja ajá ma, ajiipi kodo ma kouja. Kodeja jagamo kodo jame ka ajiipi kodo.

⁸Jame kidi epauto ko jagamo maida make ko beu kouja, kodeja jagamo kodo epauto ko jame kidiipa make.

⁹Daana jame kidi jagamo maida make ewaa jaawii ko beu, kodeja jagamo kodo jame maida make ewaa jaawii.

¹⁰Okai kouja jagamo kodo migo maida egaupija, ejuwidoke mana ebijaabija emuwakeete, jaetigo-tai bagee maida make.

¹¹Kou ko kou kodeja Tuhan duba ko jagamo kodo jame maida, daana jame kidi maija jagamo maida.

¹²Jagamo kodo epauto ko jame kidiipa make kodo danite, jame kidi maija jagamo maidaiga ewaa kai; daana utoma Ugatameepa make to.

¹³Ikii kede gai. Jagamo idaana migo te egaupijake Ugatameepa sembahjang tija, mee?

¹⁴Kou ijee kodaa ikeepa kimuwakai beu, mee? jame ijo woja jago ki-toojogo edou peu mana kodo.

¹⁵Kodeja jagamo kodo ijo woja jago ki-toojogo okai maida ajiipi mana. Okaija ijo kodo migo apume-tijake jaejajawita kouja.

¹⁶Kodeja kou danite me ka akaije dimi ga-toojogo iniija ka ijee kou dani ko beu, daana Ugatameja maakodo gai uguupuguudo maija beu.

¹⁷Ani ito kitiine mana maida make ani muta kituwai beu. Ikiija enaida kotuu timakai kou ko enaa ke-wo ko beu kuoja, kodeja peu ke-wo.

¹⁸Edoga kidi ani juwii ko, ikiija uguupuguu kotuu ti-toojogo ko ikii akaije takaida awii; daana ani mijo gaa maakodo gai.

¹⁹Kou danite ikii taka wija wido ewaa kaita, ikii jupi ka enanauto bagee ikeepa ewaa tapa ke-tijake.

²⁰Okai kouja, ikii kotuu timakipa Tuhanja nai enita mana maida make ko beu.

²¹Ikii me gakita aki-nai-nai kuoja, tijake me ino ko naidi, daana me ino ko uneune.

²²Ikii owaa beu, mee? naija agijo naida kodo. Mee? Ugatameja maakodo gai uguupuguu peu awii, daana agijo tagu bagee ego etijawii. Ani magijo kitija? Ani muta kituwaja, mee? Okai kii mana maida make ani muta ti kituwai.

²³Ani Tuhanpa make go-motita mana kodo, okai kou kodo kiti-kinii. Tuhan Jesus eekegata uno kodo okai goti motii.

²⁴Okai nigajaweege mana sembahjang tiga tijake goti utijake eteete mana, „Kii ke anija má ki, ikii maida make kijaekegajawii. Naga-toote kei tigoo tai,” etii.

²⁵Kou dani maija nojake uwaawe motijake eteete mana, „Kii uwaawe kii ke ija kijatogijawita mana anija emo manaida. Ikii naija gaa, kou dani naga-toote kei tigoo tai,” etii.

²⁶Ikii goti ki ma, uwaawe ki ma, naija gaa ikii Tuhanja bokata mana muto kodo wegakumii, okai meitagiida to.

²⁷Okai kouja meija goti kidi ma, Tuhanja uwaawe kidi ma peudaiga nopi ko, okai Tuhanja má ma, emo ma, maida peu.

²⁸Kodeja me akaato gaado tiga tijake ko goti ma, uwo ma nai.

²⁹Meija Tuhanja má kojoka no! dimi te gamakijake nopi ko, okai akaato peu aweete nai.

³⁰Okai kouja ikii jupi me wedaba debuu ma, didi ma, daana bokai ko wija to ko beu.

³¹Kodeja kou danite inii akaato boko petajawii naako, inii peu te kija.

³²Kodeja inii peu neewi-toojogo, Tuhanja nitopai, inii makiida maki utoma enaimo peu te ke-tijake.

³³Okai kouja, kowaa kei, noogeimaido, ikii naine kotuu timaki-toojogo, me idaana ka me idaana akadouto tiga tai.

³⁴Me idaana naidi kipi, okaija owaapa make nai enaa, ikiija ka kotuu te-tai kodo peu mana ikii maida te mejawe-tijake. Joko ka manaido ani jawiita naago epeepi kijataita.