Read Galela 1 KORINTUS 13 Bible Online

1 KORINTUS 13 - Galela bible

1 KORINTUS 13

¹Kou danite ani me ka manaidaiga juwa, jaetigo-tai bagee ka manaidaiga juwa wegapa maija; kodeja ani kou danite ipa dimi beu topa, ani pute tokoo juwa, pute tekuu to tigoo juwa dani bukaa kai.

²Ani gokobaki tijawiidaiga mana wegapa maija; daana boone-boone manaido gamakipa maija; epi ketago kipa maija; daana maakodo gai ko boko duwajawijake bagoudo wajagikumipa maija; kodeja ani ipa dimi beu topa ko, ani ki tumaana ma beu.

³Anija edepede utoma daba bageepa jawudipa maija, daana ani má jato najo-tijake ekegajawipa maija; kodeja ani ipa dimi beu topa ko, ani ena ma epaago beu.

⁴Ipa mana kou ko kegepa mijaanimakijake kojáá kójáá; ipa mana kodaa kegepa duba nokii beu; ipa mana kodaa nadowei beu; ibo puga na beu.

⁵Dou peu agijo te kei tija; akaato enaa kai agijo to te ubaja; emoge beu, peu agijo te ga-tou.

⁶Peu agijo ideide beu, kodeja maakodo bokoutouda ideide tai.

⁷Utoma agijo utoma bida peu dokii to; utoma agijo utoma maakodo gai; utoma agijo utoma dimi kotopijawii; utoma agijo utoma gaduwajawii.

⁸Ipa ko momogi ko beu mana; kodeja gokobaki tijawiidaiga wegai mana ko beu kaita, daana ebeida go-mote manaido duwaita, daana epi ketago manaido beu kaita.

⁹Iniija epi dimi ko paateena to kouja, daana gokobaki tijawiidaiga wegai ko paateena to;

¹⁰kodeja boko duwadoke taita gaa kodo, paateena ka manaido beu kaitai.

¹¹Ani jokaida gaa, joka ka wegaigai danite wegai; daana joka ka dougai danite dou; daana joka ka gaigai danite gai. Ani ito ibo kijake ko joka ka dimi ki mijo jaikidokii.

¹²Ito kou inii papaadou duba wanee dani dou, kodeja okai kou wagi kodo ebepeka akado. Ito ani epi paateena to, kodeja okai kou wagi kodo ani gamakaita, ani nagamakita danite.

¹³Okai kou danite maakodo gai mana ma, dimi kotopijawii mana ma, ipa mana ma, kei mana wido kei tou to; daana kei jupi ka ibo ka ko ipa kodo.