Read Galela 1 KORINTUS 14 Bible Online

1 KORINTUS 14 - Galela bible

1 KORINTUS 14

¹Ipa mana kodo bopi kepai; dedaana Roh ka niimijawita manaido goune maija juma doodoo, epauto ki ikii gokobaki tijawiidaiga wega-tijake.

²Ebeida go-mote wegaja bagee meepa etii ko beu, kodeja Ugatameepa; me idaana ma juwii beu kouja, kodeja Roh kodo ma boone-boone manaido wegai.

³Kodeja gokobaki tijawiidaiga wegaja bagee meepa jawegai, bo jawejawija mana kodo ma, etope-tai mana ma, dimi jamaipajawii mana ma.

⁴Ebeida go-mote mana wegaja bagee akaato bo wejawii, kodeja gokobaki tijawiidaiga wegaja bagee kodaa maakodo gai uguupuguu bo jawejake tai.

⁵Ani ide kodaa ikii utoma ebeida go-mote mana wega-tai, kodeja umina ide kodo ikii gokobaki tijawiidaiga wega-tai. Ebeida go-mote mana wegaja me ma ko, gokobaki tijawiidaiga wega-tai kidi ibo, mana boko te kega-toojogo, maakodo gai uguupuguu bo wedaa te-tita.

⁶Kodeja kou danite noogeimaido, ani ebeida go-mote mana wegaate ikeepa jawipa, kawe dani tijake keedadija, kou danite ewaa tapa awita mana juwa, epi mana juwa, gokobaki tijawiidaiga wegai mana juwa, kitopai mana juwa, te wega-toojogo?

⁷Ija boko ko beu agijo maija, wuu agijo kodo, kou ko mitoopi juwa, tekeuga juwa, wuu kato-kato te ti-toojogo ko, kawe danite kii ko mitoopi wuu, daana kii ka kii ko tekeuga wuu, gaja?

⁸Kou danite mitoopi utoopa to wuu ti-toojogo, meime jape makiine dougai mougai taipagi?

⁹Ikii maija, kou dani: ikii ebeida go-moteida ewaida beu mana godapa, kawe dani tijake wegata mana kodo meido gamakija? Kou danite ikii mana kodo ukijautouda jamo emigimakai to.

¹⁰Kii makiida kiija me mana gimo ewaga topai, daana mana boko tagu ena ma beu.

¹¹Kodeja mana gimo kodo ani boko jato gai beu ki-toojogo, mana wegaate me pekaida ani ojaa me, daana mana wegaate kidi maija ani pekaida ojaa me.

¹²Ikii na kou dani; Roh ka niimijawita manaido ikii juma doodoo kouja, maakodo gai uguupuguu bo jawejake taine kodo juma doodoo tai.

¹³Okai kouja, ebeida go-mote mana wega-tai me sembahjang ediimai, mana boko kegajawe-tita.

¹⁴Ani ebeida go-mote mana sembahjang tipa, anija roh kodo sembahjang kodeja dimi ka ko epaago agijo te mejawija.

¹⁵Ito kou kawe dani no? anija Roh ka sembahjang taipiga, daana dimi ka maija; ani roh ka ebetaataa taipiga, daana dimi ka maija.

¹⁶Beu kipa, aki roh ka to nagajaweege eti-toojogo, kawe dani tijake ewo me kidaa akija nagajaweege wegata mana maida „amin” wegaja? Mana boko jato kodo ewo kouja.

¹⁷Aki maa kou nagajaweege etii kodeja, joko bagee bo jawejake tai beu.

¹⁸Ani Ugatame muta etuwai, ikii utoma ko ani ki umina ebeida go-mote mana wega-tai,

¹⁹kodeja maakodo gai uguupuguuda mana te gakimake gomoteida wegai kodo ma ko mana muto idibi to dimi ka wegai ide, joko bagee bo jawejake taine tijake.

²⁰Ei, noogeimaido, dimi duba joka te kai; peu manaida joka tou to kodeja dimi mana boko duwajawii.

²¹Dijo douja manaida ebijamakita kouja: Ojaa bagee ka mana gimoudaiga, Daana ojaa bagee ka ebeidaiga Kii bageepa mana wegaita. Kou kei tijake kodeja okei te najuwaitai, Tuhanja mana.

²²Okai kouja, ebeida go-moteida wega-tai kodo dou agijo kodo, maakodo gai bageepa ko beu, kodeja maakodo gai beu bagee maida make. Kodeja gokobaki tijawiidaiga wega-tai kou ko maakodo gai beu bagee maida make ko beu, kodeja maakodo gai bagee ipuwe.

²³Okai kou danite maakodo gai uguupuguu kotuu timakijake me utoma ebeida go-moteida wega-toojogo, tijake ewo bagee juwa, maakodo gai beu bagee juwa, wadoujo ki-toojogo, beu, mee? ikii ke enijaanija kitiipigai.

²⁴Kodeja kou danite me utoma gokobaki tijawiidaiga wegatoojogo, tijake maakodo gai beu me juwa, ojaa bagee juwa, wadoujo ki-toojogo utoma bagee ka okaija peu kei tita kegei-kegei jatija; utoma bagee ka egaado etai.

²⁵Tijake kegepa dimi ewaida jaawijake apaipu tidoke tijake Ugatame migaakobe etai, kei teete mana, „Beu maa kou, Ugatame ikii jupi topi no!”

²⁶Ito kou, kawe dani mana no? ei, noogeimaido. Ikii kotuu timakijake me gakita ebetaataa mana topi juwa, etopai mana topi juwa, ewaida awita mana topi juwa, ebeida go-mote mana juwa, kegajawii mana juwa. Utoma agijo utoma bo akawejake taine tijake kei tai.

²⁷Ebeida go-moteida wega-toojogo, wija juwa, wedaba kitoojogo wido to; kodeja meena tiga tiga tijake me idaana mana boko kegajawii.

²⁸Kodeja kou danite kegajawii me beu ki-toojogo, okei utoma maakodo gai uguupuguu jupi gabo tojake akaato kidiipa ma, Ugatameepa ma wegai.

²⁹Gokobaki tijawiidaiga wega-tai bagee wija wido mana wegajake joko kaido ke igi jajakii.

³⁰Kodeja kouda kodaa animakita me idaana gokobaki titoojogo, edoga ka me kidi ki gabo kai.

³¹Ikii utoma meena tiga meena tiga wegai enaa kouja, ikii utoma topimakijake bo we-tijake.

³²Gokobaki tijawiidaiga wega-tai bagee kedaa roh kodo okei maida ejuwidoke.

³³Ugatame kii ko kigikuwa ko beu kouja, kodeja muka-muka bokouto me. Maakodo gai uguupuguu utoma duba danite

³⁴jagamoudo kodo maakodo gai uguupuguu duba gabo tou to. Okei mana te wegai, kodeja ejuwai to, dijo douja manaida enita danite.

³⁵Okei tumaana agijo epi kaine ga-toojogo, owaapa make jamaaneepa etidou. Maakodo gai uguupuguu duba jagamo idaana mana wegai ko edou peu kouja.

³⁶Ikeepa make, mee? Ugatameja mana podomeenii kou ko. Mee? ikeepa to Ugatameja mana dakii tita?

³⁷Me idaana akaato gokobaki tijawiidaiga wega-tai juwa, Roh jago juwa, gapi ko, okai gai to, ani ebijaaga mana kou ko Tuhanja nitimakita mana kodo.

³⁸Kodeja kou danite me idaana aadaba tijawipi, aadaba tijawii to.

³⁹Okai kouja, kowaa kei, noogeimaido, gokobaki tijawiidaiga wegaine tijake juma doodoo tijawii; daana ebeida go-mote mana wegai kodo beu te etii.

⁴⁰Kodeja utoma agijo utoma enaa takaidaiga epeepite kei te-wo.