Read Galela 1 KORINTUS 2 Bible Online

1 KORINTUS 2 - Galela bible

1 KORINTUS 2

¹Ani ki maija, ei, noogeimaido, ani ikeepa meetega gaa kodo, Ugatameja boone-boone mana kodo deega-deega mana juwa, dimi boko mana juwa, wegaate mei ko beu.

²Anija dimi gai ko ikii jupi joko ka mana te gaine, kodeja Jesus Keristus to, pija boko maida edajawita kidi.

³Ani ki debuu ma, weda ma, pigi-pigi umina ikii jupi.

⁴Anija wudeiga mana kodo dimi boko manaidaiga me kegepa jago-mote beu, kodeja Roh ma bida agijo ma kei tijaidaiga;

⁵ikiija maakodo gai kodo me ka dimi boko maida epijadaa te te-tijake, kodeja Ugatameja bida maida to.

⁶Kodeja boko duwajawita bageepa inii dimi boko mana wegai, kodeja makiida ka dimi boko ko beu, daana makiida ka iboudo ka dimi boko na beu, beu kaine bagee kede.

⁷Kodeja inii Ugatameja gabouga boone-boone ka dimi bokouto kodo wegai; makiida ewaa kai beu gaa Ugatameja ajiipi bokouto nijaduwajawita mana kodo.

⁸Kii makiida ka iboudo me idaana ma gamakai beu kodo; ko danite okei gamakai naako, ajiipi jago me kidi pija boko maida te edajawi-toja.

⁹Kodeja kapogeije ebijamakita kodo danite: Peka ka te doja agijo, Daana gapa ka te juwija, Daana me ka kegepa duba dimi te gaja, Kou kodo Ugatame ei egai bagee maida make epeepi jatimakita.

¹⁰Kou kodo Roh maidaiga Ugatameja niti-niimita. Roh kodaa utoma agijo utoma igi jakimakai kouja; kou ko Ugatameja te epitado agijoudo keetigo maija.

¹¹Meija me ka kegepa epi kija, kodeja me kidi duba ka dimi mana kodaa to. Kou dani maija me idaana ma Ugatameja kegepa gamakai beu, kodeja Ugatameja Roh kodaa to.

¹²Inii ke makiida ka roh go-motii ko beu, kodeja Ugatameepa make Roh kodo, Ugatameja ojaa niimita manaido kodo inii gamake-tijake.

¹³Kei manaido kei inii me ka topija dimi boko manaidaiga godai ko beu, kodeja Roh ka topija manaidaiga; Roh jago daniija Roh ma akautuutu tijake.

¹⁴Utoopa bagee kodaa Ugatameja Roh ka menija agijoudo te go-motija; kou mana kodo dimi beu mana gai kouja, daana gamakai beu, Roh ka dimiidaiga to igi jakija kouja.

¹⁵Kodeja Roh jago bagee kedaa utoma agijo utoma igi jakimakai; okai kidi ki me idaana ka ma igi te ejakimakija.

¹⁶Meija Tuhanja dimi boko epi kija? etopido taine tijake. Kodeja inii ke Keristusja dimi boko jago bagee kede.