Read Galela 1 KORINTUS 3 Bible Online

1 KORINTUS 3 - Galela bible

1 KORINTUS 3

¹Kodeja ani ki, ei, noogeimaido, Roh jago bageepa etija danite mana te keewegamake, kodeja me ijeida ka bagee kede etija danite, kou ko Keristus duba ka mijo joka to tou tita bageepa dani bukaa.

²Amauwo kineetega, naija agijo ko beu; ikii te nomake kouja, daana ito kou maija ikii te nomake.

³Ikii ito kou maija me ijeida ka dimi ga-tai kouja. Ikii jupi digi akadoke tijake akaije dimi ga-toojogo, beu, mee? ikii me ijeida topa, daana me ijeida ka bagee ka kei teigai danite kei tai.

⁴Me idaana ka „Ani ki Paulus jato,” daana me idaana ka „Ani ki Apollos jato,” wegaatigo ko, beu, mee? ikii me ijeida ka bagee kede.

⁵Apollos kidi magijo na ki? Daana Paulus kidi magijo na ki? Kei ke kijakei te-tai bagee kede, okei maidaiga ikii maakodo gata, Tuhanja me gakita menijawita kodo danite.

⁶Ani ki wejake me, daana Apollos ki munijake, kodeja Ugatame ki ejajake.

⁷Okai kouja, wejake me maija, munijake me maija, epa beu, kodeja Ugatame, ejajawe-tai me kidi to.

⁸Wejake me ma, munijake me ma ena kidi to, daana me gakita kei tita kei tita danite petege go-motii.

⁹Inii ke Ugatame ma ookei te-tai kouja. Ikii ke Ugatameja mude, Ugatameja migijake.

¹⁰Ugatameja ojaa naimita manaidaiga uwo dinita mige-tai danite kabo makijaweetega, daana me ino kou wado migijawii Kodeja me gakita kou wado migeete takaa kodo epeepite gai.

¹¹Joko ka kabo me idaana ka ma te makija kojoka, kodeja makidoke tita kodo to, kii ko Jesus Keristus kidi.

¹²Kou danite me idaana kabo wado mas, perak, deedopeedo mogo, pija, makóó, tagiida migijawi-toojogo,

¹³me gakita kei tita agijo ewaa tapa kaita; putu naago kodaa ewaida jaawita kouja, bodija ka ewaida awijake. Akija kei tita kei tita bodija ka egaado taita kouja.

¹⁴Me idaana ka kabo wado migijawita agijo kodo tomakipi ko, okai petege go-motiitagi.

¹⁵Kou danite me idaana ka kei tita mana kodo bodija nojawipi ko, okaija agijo uwadoke. Okai kidi ajii tai, kodeja bodija odidoke tita me dani bukaa.

¹⁶Ikii ewo, mee? ikii kede Ugatameja owaa kodo, daana Ugatameja Roh ikii duba topa ko.

¹⁷Me idaana Ugatameja owaa kodo peu awipi, Ugatameja peu eewiitagi. Ugatameja owaa kodo jimubeu kouja, kou ko ikii kede.

¹⁸Me idaana ma akaato kadee te makii. Ikii jupi me idaana kii makiida kiija ani epi no! gapi ko, okai dimi beu me kai enaa, dimi boko jago ke-tita.

¹⁹Kii makiida ka dimi boko kodo Ugatame pekaida dimi beu mana kouja. Kapogeije ebijamakita danite: Dimi boko jago me kidi dimi bokoutoudaiga Ugatameja gadi eetii.

²⁰Daana mana mutoona na: Tuhan epi kodo, dimi boko jago me kidaa dimi ko wogidaa kodo.

²¹Okai kouja, me idaana ma me ka mana maida kobidoke te tai. Utoma agijo utoma ikii ipuwe kouja.

²²Paulus na, Apollos na, Kepas na, makiida kiija maija, umi-tou maija, bokai maija, ito kii gaa kidi maija, wado ka putuuda maija, kei utoma ikii ipuwe.

²³Daana ikii ke Keristus ipuwe, daana Keristus kidi Ugatame ipuwe.