Read Galela 1 KORINTUS 4 Bible Online

1 KORINTUS 4 - Galela bible

1 KORINTUS 4

¹Kou dani tijake inii ke Keristus jakei te-tai bagee kede, daana Ugatameja boone-boone manaido jajaki-tou bagee kede me ka nigai enaa.

²Me ka agijo jajaki-tou me kidi enanauto edomakai beu kai peu.

³Ikiija ka boko napetai juwa, me ka juwa, ani mijo mana to jaikai. Ani akaato kidi maija boko petai beu.

⁴Ani peu topa juwa ko ewo, kodeja kou dani tijake enaa naawii beu. Tuhan kidaa boko napetai.

⁵Okai kouja putu beu gaa kodo tumaana mana ma te duwajawii, Tuhanja meitagiida to; bunita duba boonita manaido awe tapa awiitagi, daana me ka kegepa duba gata dimi kodo ewaida awiitagi. Tijake me gakita muta etuwai mana kou ko Ugatameepa make kaita.

⁶Kou mana kodo ani akaato ma, Apollos kidi ma gaagoo, ei, noogeimaido, ikii maida make; inii maida make tope-tijake, ugata mana te etigajake ibo dimi te gai, meena ibo te ejaikijake me ino daba te ejaikai.

⁷Meime wo etige kaaweegi? Daana aki go-motii beu agijo ko magijo tope? Aki go-moteetege keetigo ko magijo taine kobidoke tai, go-motii beu kidi jaijo.

⁸Ikii mobu keega! Ikii tonawi! Inii beuda ikii maki jakimake-tai bagee keega! Ikii maakidi jakimake-tai naako enaa, inii ikii ma enaimo maki jakimake-tijake.

⁹Anija gai ko, Ugatameja inii eti-awita bagee kede ketago nijaikita, boka-tijake ejaikita bagee danite. Inii ke makiida ka pegee-pagee nite-tai bagee kede, daana jaetigo-tai bagee ka, daana me ka ko.

¹⁰Keristus maida make inii ke dimi beu bagee, kodeja ikii ke Keristus duba dimi jago. Inii ke debuu, kodeja ikii ke bida. Ikii ke ibo kijaikita, kodeja inii ke daba nijaikita.

¹¹Ito kii gaa kidi to inii naidi ma, gewe-gewe ma, makii agijo beu ma, nigina ma, touda beu ma.

¹²Inii kede gane ka ee ma kei te-tai. Niwidogijake inii mobu jaediimai; peepu nitijake inii didi gaduwagoo;

¹³niduwajake inii kojáá mana wegai; inii ke makiida ka idajake tita etooki jatuuki keege; utoma agijo utoma deemigijake ka jimuudo kijake kii kidi ito na tou to.

¹⁴Ikii egoti kitijawiine tijake kou dani ebijai ko beu, kodeja anija ipa kigata jokaane kede danite kitopaine.

¹⁵Keristus duba migougu kijamakii bagee te gakimake keetigo maija, ikiitai wedaba ko beu. Keristus Jesus duba ani kidi ikiitai keega, ajii manaidaiga.

¹⁶Kojoka ani kidiimai, anija kineetega komouga naapei.

¹⁷Okai kouja ani Timotius ikeepa kijaebadikumeetega, anija ipa egata joka kidi, Tuhan duba enanauto; anija takaa takaija Keristus kidi duba okai ga-kiniitagi, anija maakodo gai uguupuguu gakita duba etopeiga kodo danite.

¹⁸Kodeja me ida wija wido akaato kobidoke tai; kou ko, ani ti kidou jawiita jaijo.

¹⁹Kodeja Ugatame enaa gapi ko, ani egaa kodaa ikeepa jawiita, tijake akaato kobidoke teete bagee mana kodo to epi kai beu, kodeja okeija bida agijo kodo maija.

²⁰Ugatameja jakimakita makiida kou ko mana to ko beu kodeja bida agijo kodo.

²¹Ikii magijo ide? Ani godijai ma jawii, mee? ipa ma kojáá peu kidi jawii ko.