Read Galela 1 KORINTUS 6 Bible Online

1 KORINTUS 6 - Galela bible

1 KORINTUS 6

¹Ikii jupi ikii kede pitokaine mana ewaa kijake utoopa bagee jumaapa pitokai uu gaja, mee? jimubeu bagee jumaapa ko beu kou ko.

²Ikii ewo, mee? jimubeu bagee kedaa makiida maki utoma boko petaitai. Ikii kedaa makiida boko petaita keetigo ko, kii mijo mana ki ikii boko te petamakija, mee?

³Ikii ewo, mee? inii jaetigo-tai bagee kede boko japetaitage kodo. Keetigo ko umina kidi kii makiida ka mana ki maija.

⁴Okai kouja, kii makiida ka manaido ikii boko petapa ko, ikii maakodo gai uguupuguu duba beu bagee jumaapa ewaa awija, mee?

⁵Ikii ego ga-tijake kou mana kiteega. Ikii jupi me idaana ma dimi boko jago me beu topi, mee? ikii keneka bagee jupi mana duwajawii me.

⁶Kodeja enakeneka bagee kede aapitokai kou, kou ko ojaa bageepa maija.

⁷Kou danite ikii ijeije akaate mana kodo kiuwai mana. Ma gijo ka peepu kitai mana gaduwagoo beu? Magijo ka kijabokomai mana enaa gai beu?

⁸Kodeja ikii kede peu kei tijake puja akauke, ikii keneka bagee kede.

⁹Ikii ewo, mee? peu bagee Ugatameja jakimakita makiida ka didee te go-motiitai. Ikii uneune te tai. Mogai jago ma, utoopa migaakobe te-tai ma, kikija epauto bagee ma, akaatabe ma,

¹⁰oma ma, kibigi ga tai ma, utaadijo uneune ma, me eduwatai ma, bokome-tai ma, kei utoma Ugatameja jakimakita makiida didee te go-motija.

¹¹Ikii me ino tika kou ka ijee. Kodeja ikii ke kiwitogita; ikii jimubeu keewita; Tuhan Jesus Keristus ekaidaiga maakodo keewita, iniija Ugatameja Roh kodoudaiga.

¹²„Utoma agijo utoma ani ki pijo,” kodeja utoma agijo utoma ko epaago ko beu. „Utoma agijo utoma ani ki pijo” kodeja tumaana agijo ka bida maida najakimake-tijake ide beu.

¹³„Naija agijo kodo modo maida make, daana modo kodo naija agijo maida make.” Kodeja okejai wija Ugatameja beu awiitagi. Má jato kodo mogai maida make ko beu, kodeja Tuhan maida make, daana Tuhan kidi má jato kodo maida make.

¹⁴Ugatameja Tuhan kidi eenigojawita, daana okai kidaa bida bokouto ka neenigojawiitagi.

¹⁵Ikii ewo, mee? ikiija má kou ko Keristusja tineido kodo. Okai kouja ani Keristusja tineido kodo mogai jago jagamo ka tine awija, mee? Umina maa kou beu!

¹⁶Ikii ewo, mee? meija mogai jago jagamo ma tawadoke tijake, okai ma ena tine kidoke. Kapogeije ebijamakita kouja, „Okejai ena tine aakai.”

¹⁷Kodeja meija Tuhan ma tawadoke tipi, okai ma ena roh kai.

¹⁸Mogaipa make okii to tai! Joko ka peudo me ka kei titaido kodo ebaidaiga; kodeja mogai jago me kidaa má jatouga peu kei tai.

¹⁹Ikii ewo, mee? ikiija má kodo Rohulkudus ka owaa ikii duba; Ugatameepa make ikii go-motijake. Ikii ke ikii kede ipuwe ko beu.

²⁰Edaja age ka keeda-motita kouja. Okai kouja ikiija má jato kodoudaiga Ugatame ibo ejaikai.