Read Galela 2 KORINTUS 1 Bible Online

2 KORINTUS 1 - Galela bible

2 KORINTUS 1

¹Ani ki Paulus kidi Ugatameja gata dimiidaiga Keristus Jesus eti-awita me kidi, daana iniikeneka Timotius kidi maija, Ugatameja uguupuguu Korintus makiida, daana Achaja dokoo puki ka jimubeu bagee utoma kapogeije kijamakii.

²Jikoo bokouto ma, muka-muka bokouto ma, Iniitai Ugatame kidaa boko kijaduwajawii, daana Tuhan Jesus Keristus kidaa maija.

³Iniija Tuhan Jesus Keristusja Nakame Ugatame kidi umina muta etuwai, kii ko ipa epauto Iniitai kidi, daana gaagaa maida make maipajawe-tai epauto Ugatame kidi.

⁴Iniija gaduwaate utoma duba nijamaipajawe-tai kidi, inii na gaagaa bagee kede dimi jamaipajawe-tita, okai kou maipajawita dimi kodaa, Ugatameja inii na nijamaipajawita dimi kodoudaiga.

⁵Keristusja gaduwata kodo inii maida abuma ke-wo danite, okai kou dani maija Keristus maidaiga maipajawii mana kodo inii maida abuma ke-wo.

⁶Inii gaduwa-toojogo, ikii ke dimi maipajawii ma, ajii tai ma maida make; daana kou dani maija inii dimi nijamaipajawi-toojogo, ikii ke kijamaipajawii kodo maida make; iniija gaduwaige manaido ikii na kojáá peu kidi gaduwajake kodo.

⁷Iniija ka ikii maida kotopijawita dimi kodo boko duwadoke; inii epi kouja, iniija ka gaduwajaidaiga ikii na gaduwai danite, okai kou dani maija iniija ka dimi maipajawiidaiga kai.

⁸Inii ide ko beu, kowaa kei noogeimaido, ikii ewo kodo inii Asia dokoo gaagaa teetege kodo; inii umina gaagauto kodo dokii kaga kijake ume-wo dimi kodo wado gai beu.

⁹Beu maa kou, iniija ka gai ko, bokai to gai; inii akaato dimi te kotopijawe-tita, kodeja bokata bagee eenigojawe-tai Ugatame kidi to.

¹⁰Peu umina bokai mana maida make nipipikajawita me kidi; daana wado maija nipipikajawiitagi. Inii okai maida dimi ekotopijawii, wadaato na nipipikajawiitagi kouja.

¹¹Ikii na sembahjang ka needadai kouja. Tijake me wedaba inii maida make Ugatame nigajaweege ete-tita, niimijawita manaida make, me wedaba ka sembahjang nitita kouja.

¹²Iniija ka kobidoke mana ki; iniija ka dimi ka mana kodo, kou ko inii makiida kiija, daana epauto ko ikii jatouga, jimubeu ma pidou pidou ma Ugatame pekaida kei teige, makiida ka dimi bokoutoudaiga ko beu, kodeja Ugatameja jikoo bokoutoudaiga.

¹³Inii tumaana ma kapogeije kijaebijai ko beu, kodeja ikii ebatijake gamakai manaido kodo to. Daana ani dimi kotopijawii kodo ikii momogi jato ko gamakaita.

¹⁴Ikii mijo gaa nigamakai kodo danite; kou ko, inii ke ikiija ka kobidoke mana kodo, ikii na iniija ka bodo danite, Tuhan Jesusja putu naagouda kodaa.

¹⁵Kou dimi kotopijawita kouja edoga kidi ikeepa jawiine dimi gai, ikii kigi wijaago ideide te-tita,

¹⁶kou ko, ani ikeepa umidokijake Makedonia uwii, tijake Makedonia make ikeepa joko mei, daana ikiija Judea nabadikume-tita.

¹⁷Ani kou gajake utoopa kitii to, mee? Mee? anija gata mana kou ko me ijeidaiga kei tijake „ii” ma, „beu” ma, ena kidi awii, mee?

¹⁸Ugatame kidi ki enanauto me kijoka, iniija kitii mana kou ko „ii” ma „beu” ma mana ko beu.

¹⁹Ugatame Joka, Jesus Keristus kidi, iniija kiti-kineetege me kidi, ani ma, Silwanus ma, Timotius ma ka, okai ki „ii” ma, „beu” ma, mana ko beu, kodeja okai kidi ki „ii” to.

²⁰Ugatameja nijatogijawita manaido utoma okai duba ko ii to kouja. Okai kouja okaimaidaiga Ugatameja ajiipi maida make iniija ka „Amin” wegai.

²¹Inii na ikii na Keristus duba bo niwejawijake nijatuumita kidi ki Ugatame kidi;

²²okai kii kidi tegee nidojawijake Roh tiga iniija kegepa duba niimijawita.

²³Kodeja Ugatame epi ani ipa kigai kouja ani Korintus makiida jawii beu topa.

²⁴Inii ikiija ka maakodo gai kodo bida peu kitimakaine ko beu, kodeja ikiija ka ideide dimi kodo keedadaine; maakodo gai manaida ikii pigu atijake tou to kouja.