Read Galela 2 KORINTUS 10 Bible Online

2 KORINTUS 10 - Galela bible

2 KORINTUS 10

¹Ani ki Paulus kidaa, Keristusja mijo kegepa maidaiga ma, kojaidaiga ma kitii, ani ki ikii jumaapa daba me, kodeja poto make ko ikeepa uu peu kidi;

²ani kidiimai, ani ikeepa jawipa ko, ani bidaidaiga uu peu kidi ti kimuwakaine, ani gata danite, ani me ka ijeidaiga kei teiga nagata bagee kedeepa.

³Inii makiida umi-tou kodeja makiida ka ijeidaiga jape makii ko beu.

⁴Iniija jape motija ka mapega kou ko makiida ka ijeidaiga ko beu kouja, kodeja Ugatameja bidaidaiga pigu tita agijo bogobagi tijake tai.

⁵Me ka go-jikii mana inii daba ejaikai; daana ibo mana gakita maija, Ugatame egamakai akaije manaido kodo. Tijake e dimi te dimi Keristus to ejuwidoke te-tijake inii bida peu jakimakai.

⁶Tijake juwidoke beu bagee kede wegee etikumii, ikii juwidoke kodo boko duwajawijake ko.

⁷Dodowei, ikii jumaapa ka mana kodo. Me idaana akaato kidi Keristus ipuwe no! dimi epaapa timakipi ko, akaato gamenii, okai Keristus ipuwe kita danite ko, inii maija.

⁸Kou danite iniija bida agijo kodo maida make ani umina kobidoke tipa maija, Tuhanja bida niimijawita kodo, bo kiwejawe-tita tijake, peu keewiine ko beu; ani ego te gaja mana.

⁹Anija kijamakii kapogeije kodaa wedaago kitaine tijake dimi te nagai.

¹⁰Me ka wegai kouja, „Okaija kapogeije kou ko udo ma, bida ma; kodeja epoo ko epa beu, daana mana kodo wogidaa.”

¹¹Kii me kidi gai: Ani poto make kapogeije ebijamakeetega danite, ani tojake na kou kei tai kodo.

¹²Inii uu ko beu kodo akaato ibo gai bagee ma enaida kai; juwa, okei ma akaato utuutu tidou juwa. Kodeja okei kede akaabijadou ma, utuutu akaate ma ko dimi beudaiga.

¹³Kodeja inii ke momogi ko beudaiga kobidoke taine ko beu, kodeja Ugatameja momogi nijaawitaida to, kou ko ikeepa maija.

¹⁴Inii akaato ibo awii ko beu, inii ikeepa te dakii danite, ikii poto ka kedeepa inii Keristusja ajii mana kodo keewegana teetege kouja.

¹⁵Inii me ino ka kei titaidaiga kobidoke kou ko te duwajawii ko beu. Kodeja inii kou dani dimi kotopijawii ko, ikiija ka maakodo gai kodo bo we-wo tijake iniija ekowaja mana kodo ikii jupi enaa ke-wo.

¹⁶Inii ajii mana wudeete kodo ikii wokaato kaine tijake; me ino ka kei timakitaida kodaa kobidoke te tijake.

¹⁷Kodeja „Meija kobidoke tipi, Tuhan maida kobidoke tai.”

¹⁸Okai akaato muta etuwaja me kidi pidou pidou me ko beu, kodeja Tuhan kidaa muta etuwaja me kidi.