Read Galela 2 KORINTUS 2 Bible Online

2 KORINTUS 2 - Galela bible

2 KORINTUS 2

¹Ani kegepa duba boko duwajaweega, kigeena ma gaagaa ma ti kidou jawiine.

²Kou danite ani gaagaa kitijawipa ko, meija ideide natijawija, kodeja anija gaagaa etijawii kede to?

³Ani kou dani kapogeije kijaebijaatega, kou danite ani dakii tipa ko, ideide natijawija bagee kodaa gaagaa te natijawe-tita. Ani ikii utoma maida dimi kotopijawii kouja, anija ideide dimi kodo ikiija ka ideide kodo maija.

⁴Ani kapogeije kijaebijaatega kodo gaagaa ma, kegepa juwikigi ma, jege ma, gaagaa kitijawiine ko beu, kodeja anija umina ipa kigata mana kodo ikii epi ke-tita.

⁵Kodeja kou danite me idaana ka gaagaa mejawipi, gaagaa kodo ani maida ko beu, kodeja ino kou ikii utoma maida, ibo mana taawiine tijake.

⁶Kii me kidi me wedaba ka peu eewijake ko tiki.

⁷Ikii dimi betokijake ko ipa ejaikijake dimi jamaipajawii, okai umina gaagaa ka duwaa-duwaa na kojoka.

⁸Okai kouja ani kidiimai, ikiija ka ipa dimi kodo okai maida jaawii.

⁹Okai kou maida make ani kapogeije kijaebijamakeetega, kigaado taine tijake, ikii utoma manaida juwidoke, mee? titaida ka.

¹⁰Me idaana ikii ipa ejaikipa ani na ipa ejaikai; ani ipa ejaikai mana kodo (ipa ejaikija mana topa ko), ikii maida make Keristus pekaida ipa ejaikai.

¹¹Teege kidaa neetigadokii na kojoka, okaija go-mote ga-mote kodo inii ewo ko beu kouja.

¹²Ani Keristusja ajii mana wudiine tijake Teroas dakii tita gaa, daana Tuhan maida make ita nawadijake kodeja

¹³ani kegepa mobu beu, ani keneka Titus kidi edomakai beu kouja. Okai kouja ani ejaikijake Makedonia amo uwii.

¹⁴Kodeja Ugatame muta etuwai, Keristusja bida bokoutoudaiga umina kotomina migougu nijamakii me kidi, daana inii maidaiga Keristus epi kija unu enaa agijo kodo kiida kouda gabumidaa tai.

¹⁵Inii ke Ugatameepa Keristusja unu enaa kodo, ajii taine bagee jupi ma, peu kaine bagee jupi ma.

¹⁶Kou ko, peu kaine bageepa ko bokai unu kodo bokaida to; kodeja ajii taine bageepa, ajii tai unu kodo ajii taida to. Meija kou mana kou dougai mougai timakija?

¹⁷Inii ke me wedaba dani bukaa ko beu, Ugatameja manaidaiga bago kaine ubaate dimi ko, kodeja inii doodoo kegepa ka wegai. Ugatameja nibadikumita kouja; Ugatame pekaida Keristus duba inii mana wegai.