Read Galela 2 KORINTUS 3 Bible Online

2 KORINTUS 3 - Galela bible

2 KORINTUS 3

¹Inii kigeena ma akaato muta etuwai go-motii, mee? Inii muta nituwai kapogeije gai peu, mee? joko ka bagee dani bukaa, ikeepa kijamakiine juwa, ikeepa make motita juwa

²Ikii ke iniija ebijamakita kapogeije, iniija kegepa duba ebijata, me utoma ka dojake gamakai kodo.

³Ewaida kodo ikii ke Keristusja kapogeije kidi, iniija ka wado makita, ebijaja uwo ka ebijamakita beu, kodeja ajii tai Ugatameja Roh kodaa; mogo kapouda ebijai ko beu, kodeja me ka kegepa kapouda kodaa.

⁴Inii kou dani Keristus dubaiga Ugatame maida epaapa timakai.

⁵Inii tumaana agijo maida make tiki kodo ko gai kou ko epautouda akaato ko beu, kodeja epauto ko Ugatameepa make to.

⁶Okai kidaa tiki tiki nitijawii, ija ka togijawita mana kodo wude-tai bagee ke-tita, ebijajake dou epeepe ko beu, kodeja Roh epeepeidaiga; ebijajake dou ka mana kodaa bokajawii mana kouja, kodeja Roh kodaa ajii ti-menii.

⁷Kodeja kou danite bokai mejawii mana kodo mogo kapouda ebijamakijake umina ajiipiidaiga me-toojogo ko, tijake Israil bagee Musaja ebepeka edomakai kana gai, ebepeka maida ka ataati beu keete kodo maida make kouja,

⁸beu, mee? Rohdaiga mejawii mana kodo umina ajiipi kodo.

⁹Peu awii gaa kodo ajiipi ma ki-toojogo, enaa awii gaa kodo umina ajiipi wado etige.

¹⁰Beu maa kou, tika ka ajiipi jago kodo ajiipi beu kidoke, umina didéé ajiipi jago kodaa akanawa te tija kouja.

¹¹Igadoke taine mana kodo ajiipi ma me-toojogo ko, te igaja mana kodo ajiipi umina wado etige.

¹²Inii kou daniidaiga dimi kotopijawii kouja, inii uu peu kidi wegai,

¹³Musa ebepeka apumita dani ko beu; igadoke taine ajiipi kodo Israil bagee te jado-tijake.

¹⁴Kodeja okeija ka dimi kodo bida kita, tijake ito naago maija tika ka togijawita mana kodo ebati-toojogo, apumita agijo kodo tojake ekadidoke tai beu; Keristus maidaiga to ekadijawii kouja.

¹⁵Beu maa kou, ito kii naago kiija to Musaja kapogeije ebatitoojogo apumita kidi ki kegepa maida apumidoke tijake tou.

¹⁶Kodeja kou danite kegepa ko Tuhanpa wouga ki-toojogo ko, apumita agijo kou ko ekadidoke tai.

¹⁷Tuhan kidi ki Roh kodo; daana Tuhanja Roh tojaida kodaa epipikajawii mana kodo.

¹⁸Kodeja inii utoma ebepeka apumai beu tijake papaadou douja danite Tuhanja ajiipi kodo ajaidaiga tijawii; daana kou epoo kodo enakenake nite-wo, kou ajiipiida make ajiipi te-wo, epauto ko Tuhanja Roh kodaa.