Read Galela 2 KORINTUS 6 Bible Online

2 KORINTUS 6 - Galela bible

2 KORINTUS 6

¹Inii Ugatame ma ookei te-tai danite kidiimai; ikii Ugatameja jikoo bokouto utoopa to te motii.

²Okaija ka wegai kou dani kouja: Enaa wagiida ani kajuweetega, Daana ajii naagouda kaadadeetega. Maa kou, ito kii wagi kii ko enaa wagi kodo; beu maa kou, ito kou ko ajii naago kodo.

³Me duwaa-duwaa etijawii mana ena ma kei tai beu, iniija kei tai mana kii ke anaani beu ke-tijake.

⁴Kodeja utoma takaidaiga inii ke Ugatame jakei te-tai bagee kede akaato emuwakai; umina kojáá peudaiga ma, gaduwaidaiga ma, gaagaidaiga ma, kigikuwaidaiga ma,

⁵kopa nigii ma, wanee owaa duba neewii ma, tetepepe ewaga ma, ee ma, doutou ma, naidi ma;

⁶jimubeudaiga, epiidaiga, kojáá peu kidiidaiga; ipa dimi ekowaidaiga, Rohulkudus dubaiga, doodoo kegepa ka ipa dimiidaiga;

⁷maakodo manaidaiga; Ugatameja bidaidaiga; gane etikaato akaato maakodo mapega dokijakeidaiga.

⁸Ibo nijaiki-toojogo maija; daba nijaiki-toojogo maija; niwidogi-toojogo maija, muta nituwa-toojogo maija; peu euketai dani kodeja maakodo;

⁹ti nidoja dani, nidou kodeja; boka boka dani, ija tou kodeja; peepu nitai kodeja ti nibokajawii.

¹⁰Gaagaa dani kodeja ideide to tou; daba dani kodeja me wedaba tonawi eewii; agijo makii beu kodeja utoma agijo utoma makii.

¹¹Kowaa kei, Korintus bagee, ikeepa iniija ebe kebadoke; iniija kegepa ko aweida.

¹²Inii duba ikii akakobome ko beu, kodeja ikii kedaa gata dimi to.

¹³Ito ko abu napai — ani jokaaneepa danite kitii — ikii kede maija aweida kidaa tai.

¹⁴Maakodo gai beu bagee ma enaimo akagadime te tai. Enaa ma peu ma ena dimi kepajawija, mee? Daana awe ma bunita ma kawe dani tijake utauta tija?

¹⁵Keristus ma Belial ma utuuja mana kato topa, mee? Maakodo gai bagee ma, maakodo gai beu bagee ma ena didee oogoja, mee?

¹⁶Daana Ugatameja owaa ma, utoopa migaakobe te-tai agijo ma utuuja mana kato topa, mee? Inii ke ajii bokouto jago Ugatameja owaa kouja; Ugatame kidaa wegata danite: Ani okei duba tojake uwina taita, Ani ki okei ipuwe me kaita, Daana okei ke anija bagee.

¹⁷Okai kouja ikii okeepa make podomijake Ikiiniinii kai, Tuhanja mana, Daana nokii agijo winiki te tai, Tijake ani kijakimakaita.

¹⁸Ani Ikiitai kijake ikii ke Ani jokaane jame jagamo kaita, E bida te bida jago Tuhanja mana kodo.