Read Galela 2 KORINTUS 8 Bible Online

2 KORINTUS 8 - Galela bible

2 KORINTUS 8

¹Inii kiti-kiniine, kowaa kei, noogeimaido, Ugatameja jikoo bokouto kodo Makedonia ka maakodo gai uguupuguudo maida make ko.

²Egaado umina teetigo kodo okei ideide dimi peijo kodo ma, daba umina ma enaida awijake bunu enaa dimi kodo umina pagi atita.

³Ewaa beu ka taitai menita, ani mana jawegai, daana umina beu kodeja ubauba ti-menita, kegepa ide gajake to.

⁴Umina bida peu kidi nidiimita, egajawijakeidaiga jimubeu bagee eedadaine tijake.

⁵Kou ko, iniija ka dimi ekotopijawita danite ko beu, kodeja edoga pukipaki akaato Tuhanpa ekegajawijake ineepa maija, Ugatameja dimiidaiga.

⁶Okai kouja inii Titus ediimai, okai mijaato go-moteetegi danite, okai kou dani maija ikii jupi enaa kei tai agijo kodo boko duwajawii.

⁷Utoma agijo utoma duba ikii wo etige danite, kou ko maakodo gai manaida ma, mana wegai ma, epi ketagouto ma, doodoo kegepa ma, ei nigai dimi ma, okai kii enaa manaida maija wo etige taine dimi gawei.

⁸Ani kou kitii ko bida peu kitimakai ko beu, kodeja joko ka bagee ka bopi kepata kodo maida make ikiija ka ei dimi ko kigaado taine tijake.

⁹Iniija Tuhan Jesus Keristusja jikoo bokouto kodo ikii epi; kou ko, okai tonawi kodeja, ikii maida make okai daba kita; okaija daba pukiidaiga ikii ke tonawi ke-tita.

¹⁰Kii manaidaiga anija dimi ko kitiine: Ikii kei tai enaa ko, mijo ka taun ikii tiga ewaawii kouja, kei tai to ko beu, kodeja kei taine dimi maija.

¹¹Kojoka ito kou, kou mana kodo boko duwajawii; ikiija ka kegepa gata kodo danite kei tai mana maija kou kodo dani tijawii, ewaa beu ka taitai kodo.

¹²Kou danite kegepa ko bunu enaa ga-toojogo, okai kou kodo juma dege-dege etijawii ko, me gakita ewaa beu ka taitaidaiga, okai maida beu agijo ko beu.

¹³Me ino enaa kijake ikii gaagaa kitaine ko beu, kodeja utuutu ke-tita.

¹⁴Ito kii gaa kidi okeija ka beu kitaija ikiija ka abuma kitaija kodaa tiki jaatii, tijake okeija ka abuma kitaija maija ikiija ka beu kitaija kodo tiki kijaate-tita, enaimo utuutu te-tita.

¹⁵Kapogeije ebijamakita danite: Wedaba momakita me kidi abuma kai ko beu; daana wija dani to momakita me kidi beu kai beu.

¹⁶Ugatame muta etuwai; ikii maida make ekowaine dimi kodo Titusja kegepa duba menita kouja.

¹⁷Iniija ediimeege mana nijuwidoke to ko beu, kodeja okai kidaa umina gajake kidou uwiine.

¹⁸Okai ma enaimo iniija keneka ebadikumii; maakodo gai uguupuguu utoma ka muta etuwata me kidi, ajii mana wudeigi maida make.

¹⁹Okai kou to ko beu, kodeja enaa agijo ekowaateidaiga neepe-tijake maakodo gai uguupuguudo ka ewitokita, Tuhanja ajiipi maida make, daana iniija ka enaa dimi ewaida ke-tijake.

²⁰Iniija ekowaate agijo peijo kodo maida make me ka ti niwidoge-tijake inii epaapa timakai.

²¹Inii enaa agijo ekowaine bopi kepajawii, Tuhan pekaida to ko beu, kodeja me pekaida maija.

²²Okejai ma enaimo inii keneka ebadikumii; kigi inoudo inii egaado tijake kii manaida kou manaida ekowai umina edomakai. Ito kou umina abuma kodaa, ikii maida umina dimi epaapa tijawii kouja.

²³Titus maida make mana kodo, okai ani jatouga kidi, daana ani ma enaimo kijakei te-tai kidi; daana joko ka kenekaija kede ke, okei maakodo gai uguupuguu ka ebadikumitaija, Keristusja ajiipi kodo.

²⁴Okai kouja maakodo gai uguupuguu utoma jumaapa ikii ei egai to, daana iniija ka ikii maida make kobidoke mana kodo emuwakai.