Read Galela 2 KORINTUS 9 Bible Online

2 KORINTUS 9 - Galela bible

2 KORINTUS 9

¹Jimubeu bagee eedadai mana kodo kapogeije kijaebijai ko beu kai peu ko beu.

²Ikiija ka kei taine no! dimi kodo ani epi kouja, daana ikii jatouga Makedonia bageepa kobidoke teetega, kou ko Aehaja kodo mijo ka taun gamakita kodo; daana ikiija ka juma doodoo kodaa me wedaba kegepa gokobaki etijawita.

³Inii keneka bagee ani ebadikumii, kou mana maida make anija ikii jatouga kobidoke mana kodo wogidaa te te-tita; ikii kei tijawe-tita, anija etita danite.

⁴Kou danite Makedonia ka bagee ani ma enaimo ikii ma akado tijake ikii epeepi te timaki-toojogo, inii ego gadoke na kojoka, ikii na ego gajake, epaapa timakita manaida kodo.

⁵Okai kouja ani gai peu, inii keneka ikeepa jawii tiga tijake ikiija ka bunu enaa ka togijawita mana kodo epeepi timake-tita; tijake bunu enaidaiga epeepi tijawe-tita, bida peu kitijake ko beu.

⁶Kii mana ki gai; Wija dani to kigii tija me kidaa wija dani to duwai; daana euga kigii tija me kidaa euga duwai maija.

⁷Me gakita kegepa duba gajake menii, gaagaa juwa, bida peu etijake juwa, ko beu. Kegepa ideide ma mene-tai bagee kede Ugatame ei egai kouja.

⁸Ugatame kidaa e mobu te mobu kijadegijawii bida jago kidi, ikii utoma wagiida utoma agijo tiki tijake utoma enaa kei tai manaida wo degijawe-tita.

⁹Kapogeije ebijamakita danite: Okai kigii te-wo; Daba bageepa mene-wo; Okaija maakodo bokouto kodo Imo kidi to togoo.

¹⁰Kigii te-tai meepa ijoo mene-tai kidi, daana no-tijake goti mene-tai kidi, okai kii kidaa ikiija ijoo kinijake wedaba kijaawiitagi, daana ikiija ka enaa ekowai mana wo ajaago kijatijawii.

¹¹Ikii utoma agijo utoma duba tonawi kijake bunu enaidaiga kei te-tita, tijake inii maidaiga Ugatame muta etuwai mana ewaawii.

¹²Enaa kei tai agijo kii ko jimubeu bageeja ka gai peudo tiki jaatii mana to ko beu, kodeja Ugatame nagajaweege etii mana euga abuma jamejawii.

¹³Kii enaa manaidaiga ikii doodoo kegepa ewaida kijadojake, okei Ugatame muta etuwaitai, ikii Keristusja ajii mana jawegai ko juwidoke kouja, daana ikiija ka bunu enaidaiga okeepa ma, me utomaapa ma, menita kodo maida make.

¹⁴Okei kogaa kigajake sembahjang kijakimakai. Ugatameja jikoo bokouto ikii maida abuma kidaa wegai ma peu kouja.

¹⁵Ugatame muta neetuwawei, okaija wegai ma peu ojaa niimijawita mana maida make kodo.