Read Galela GALATIA 1 Bible Online

GALATIA 1 - Galela bible

GALATIA 1

¹Ani ki Paulus kidi, eti-awita me kidi, (epauto ko meepa make ko beu, daana me maidaiga ko beu, kodeja Jesus Keristus kidi ma, Iniitai Ugatame kidi ma, bokata bagee jupi make eenigojawita kidiidaiga),

²daana enakeneka bagee utoma ani ma enaimo Galatia ka maakodo gai uguupuguudo kapogeije kijamakii.

³Jikoo bokouto ma, muka-muka bokouto ma Iniitai Ugatame kidaa ma, iniija Tuhan Jesus Keristus kidaa ma boko kijaduwajawii;

⁴iniija peu maida make akaato ekegajawita me kidi, ito kou ka peu makiida make nipipikajawiine tijake, Iniitai Ugatameja gata dimi epeepeidaiga;

⁵ajiipi kodo okai ipuwe kii kidi imo to togoo. Amin.

⁶Ani ego takuu-takuu Keristusja jikoo bokouto duba mana kitita kidiipa make ikii egaa kodo wouga kijake joko ka ajii manaapa kai.

⁷Joko ka ajii mana beu topa kodeja. Kodeja me ino uneune kitijawiine, daana Keristusja ajii mana kodo akabetoke tijawiine.

⁸Kodeja inii kipe maija, epaawado ka jaetigo-tai me kipi maija, joko ka ajii mana kijawudipi, iniija ka kijawudeetege ma akaije mana kodo, okei peu kugouto dokidoke tai enaa.

⁹Inii mijaato kiteetege danite, ito kigeena ma kitii, ikii jakimakeetega ka ajii mana ma akaije mana me ka kijawudi-toojogo ko, okai peu kugouto dokidoke tai enaa.

¹⁰Me ka juma dege-dege nate-tijake ani ubai, mee? Ugatame kidaa. Ani me ideide etijawiine, mee? Ani me ideide etijawii naako, ani Keristus jakei te-tai kidi ki beu.

¹¹Ani ide ikii gai, ei, noogeimaido, anija kijawudeetega ka ajii mana kodo epauto ko meepa make ko beu.

¹²Ani meepa make go-motii beu, daana natopai beu, kodeja Jesus Keristus kidaa ewaida naawii.

¹³Ani mijaato Jahudi ka manaidaiga umei tita gaa mana kodo ikii juweetega; ani Ugatameja uguupuguu peepu umina eteetega, umina peu eewiine tijake.

¹⁴Tijake Jahudi ka manaidaiga anaa ka gaa bagee ani wo etige etai, ani aijaane ka mijo makii makii mana kodo ani umina jakimakijake.

¹⁵Kodeja ani napataida make nawitokijake okaija jikoo bokouto kodoudaiga mana natita kidi

¹⁶Jokame kidi ani duba ewaida awiine gaa, ani ojaa bageepa ajii mana kodo jawude-tijake, okai kou gaa kodo ani me ma akagaado tai beu tita;

¹⁷daana ani Jerusalim wado uwii beu, ani beu gaa kodo etiawita bagee kedeepa; kodeja ani Arab makiida wo uwii, tijake Damsjik makiida wado mei.

¹⁸Kou wadouto taun wido umimakijake ani Kepas edoune Jerusalim wado uwii, tijake uno idibi ma gaati oumii.

¹⁹Joko ka eti-awitaido ena ma edou beu kidija Tuhanja keneka Jakub kidi to.

²⁰Ani kijaebijaaga mana kodo, ani Ugatame jumaapa puja beu.

²¹Tijake ani Sjam ma Kilikia ma dokoo uwii.

²²Judea ka Keristus duba ka maakodo gai uguupuguu nadou beu gaa.

²³Okei ani maida make mana juwii to, „Mijaato peepu niteetegi me kidi ito ko maakodo gai mana kodo wudeete, tika peu awiine kodeja.”

²⁴Tijake ani maida make okei Ugatame muta etuwai.