Read Galela GALATIA 3 Bible Online

GALATIA 3 - Galela bible

GALATIA 3

¹Ei, dimi beu Galatia bagee! Meija onee kidopi? Jesus Keristus pija boko maida edajawita mana kodo ikii ewaida dooga kodeja.

²Ani mana mutoona to kigaado taine. Ikii Roh go-motita kodo Musaja dijo douja manaidaiga, mee? mana juwijake maakodo gajake ko.

³Ikii kou dani dimi beu, mee? Ikii Rohdaiga go-motijake me ijeidaiga wo ewogijawii, mee?

⁴Ikii mana wedaba gaduwagootega ko wogidaa, mee? maakidi wogidaa ki-toojogo ko.

⁵Roh kinijawii ma, ikii jupi ego takuu-takuu agijo ewaa awii ma me kidaa kei tai ko, Musaja dijo douja mana kodo dijo dojaidaiga, mee? mana kodo juwijake maakodo gaidaiga.

⁶Ibrahim dani bukaa, okai Ugatame maakidi egajake maa egajawita.

⁷Kojoka ikii gai, maakodo gai bagee kede Ibrahim jokaane kede.

⁸Ugatameja ojaa bagee maakodo gaidaiga maa egajawii mana kodo ugata mana kodaa tika kodaa dojake ko, Ibrahimpa tika ajii mana jawudita, eteete mana, Aki dubaiga e bagee te bagee mobu kaitai.

⁹Kojoka maakodo gai bagee kede maakodo gata me Ibrahim kidi ma enaimo mobu bokouto gou.

¹⁰Musaja dijo douja mana kodo dijo dou maida dimi kotopijawii bagee utoma kede peu kugouto dokidoke; kapogeije ebijamakita kouja, Musaja dijo douja manaida ebijamakita manaido utoma dijo domakai beu bagee kede me gakita gakita peu kugouto dokidoke no!

¹¹Ugatame pekaida Musaja dijo douja manaidaiga meena ma maa eewii beu kodo ewaida; maa bagee kede maakodo gaidaiga ajii tai kouja.

¹²Musaja dijo douja mana epauto kodo maakodo gai maida ko beu; Musaja dijo douja mana kodo dijo domakija me kidi koudaiga ajii tai kouja.

¹³Musaja dijo douja mana ka peu kugouto kodo maida make Keristus nipipikajawita, okai peu kugouto kidoke tita kouja; kapogeije ebijamakita kouja, Pija maida edajawita me gakita peu kugouto dokidoke no!

¹⁴Keristus Jesus duba Ibrahimja mobu bokouto kodo ojaa bageepa ke-tijake, nijatogijawita Roh kodo inii maakodo gaidaiga go-mote-tijake.

¹⁵Ei, noogeimaido, me ka kei tija agijo maida make kitiine: Me ka togijawita mana kodo duwajawijake akabetoke te tijawija; juwa, mana amo te tawajawija.

¹⁶Togijawita manaido kou ko Ibrahim ma, okaija ijoo ma jatogijawita. Ugata mana kou ko, Akija ijoudo kedeepa ebijai beu topa, me wedaba jaijo; kodeja meena kidiipa, Akija ijoo kidi, kii ke Keristus kidi.

¹⁷Kii no te: Ugatameja tika kodaa boko duwajawita ka togijawita mana kodo Musaja dijo douja mana kodaa daba te ejaikimake, taun muto pituwo[1] umijake meta mana kodo, tijake epa beu taawimake.

¹⁸Gowaja mana kodo Musaja dijo douja manaidaiga keetigo ko, maakodo gaidaiga ko beu; kodeja Ugatameja Ibrahim kidiipa jatogijawita kodo.

¹⁹Kojoka Musaja dijo douja mana kodo magijo maida make? Peu kei tai agijo maida make ewaa awita, mana jatogijawita ka ijoo kidi metaida to; tijake utuujaida ka me maidaiga jaetigo-tai bagee ka boko duwajawita.

²⁰Utuujaida mana wega-toojogo ko meena to ko beu; kodeja Ugatame kidi ena to.

²¹Kojoka Musaja dijo douja mana kodaa Ugatameja togijawita mana kodo akaije, mee? Umina ko beu! Dijo dojaidaiga ajii tai mana niimai naako, dijo dojaidaiga maa neewi-toja.

²²Kodeja Ugata mana kodaa utoma agijo peu duba kugu wagimakita, Jesus Keristus maakodo gai bagee jatogijawita mana kodo maakodo gai bageepa ke-tita.

²³Maakodo gai kodo mei beu gaa, inii Musaja dijo douja mana duba nijakimakita, kugu wagidaa nitimakijake, maakodo gai kodo ewaida kaida to.

²⁴Kou dani tijake Musaja dijo douja mana kodaa Keristus kidiipa neumigou, inii maakodo gaidaiga maa nigajawe-tijake.

²⁵Kodeja ito kou maakodo gai kodo mejake inii neumigou kodo bida duba beu.

²⁶Keristus Jesus maakodo gaidaiga kodaa ikii utoma Ugatame jokaane kouja.

²⁷Ikii Keristus duba baptis kitita daniija kede Keristus makijawita.

²⁸Kouda kodaa Jahudi juwa, Gerika juwa, mana ko beu; ojaa tou bagee juwa, ejakimakita bagee juwa ko beu; jame juwa, jagamo juwa, ko beu; ikii utoma Keristus Jesus duba boda wagimakita kouja.

²⁹Ikii Keristus ipuwe keetigo ko, ikii Ibrahimja ijoo kodo, daana togijawita mana kodo gowaja bagee kede.