Read Galela EPESUS 1 Bible Online

EPESUS 1 - Galela bible

EPESUS 1

¹Ani ki Paulus kidaa Ugatameja dimiidaiga Keristus Jesusja eti-awita me kidaa Epesus makiida ka jimubeu bageepa, daana Keristus Jesus duba enanauto bageepa kapogeije kijamakii.

²Jikoo bokouto ma, muka-muka bokouto ma, Iniitai Ugatame kidaa, daana Tuhan Jesus Keristus kidaa boko kijaduwajawii.

³Iniija Tuhan Jesus Keristus kidi Nakame Ugatame kidi muta etuwai. Keristus dubaiga mobu bokouto nijaduwajawita, epaawado ka ajii ka mobu manaido utoma manaidaiga.

⁴Maki kabo makii beu gaa okai dubaiga niwitokita, inii okai jumaapa jimubeu anaani beu neewiine tijake.

⁵Jesus Keristus maidaiga okai kidaa jokaane ipa dimiidaiga nibuki-motiine tijake, tika kodaa boko duwajawita, okaija ka enaa gata dimiidaiga.

⁶Okaija ka ei egata kidi maidaiga jegeenaka jikoo bokouto niimita kodo muta etuwa-tita.

⁷Okai dubaiga inii nipipikajawita okaija emo kodaa, iniija ka peu awitaido ipa nijaikai mana kodo, okaija ugo uweuwe jikoo bokouto kodaa.

⁸Dimi bokouto ma, epi ketago maidaiga ineepa abuma nijakuwajawita.

⁹Okaija boone-boone dimi epi neewijake, okaija ka enaa gata dimi epeepe, okai kidaa boko duwajawita kodo danite.

¹⁰Putu wagiida kodaa utoma agijo utoma Keristus duba to boda wagimakaine tijake; kou ko, epaawado ka ma, makiida ka-ma, okai duba to.

¹¹Kii kidi duba maija inii nijatogijawita mana gowa-motii, Ugatameja tika kodaa boko nijaduwajawijake, utoma agijo utoma okai kidaa gataidaiga kei tijawii me kidi.

¹²Inii edoga kidi Keristus maida dimi ekotopijawita bagee kedaa okaija ajiipi bokouto kodo muta etuwa-tita.

¹³Okai duba ikii maija maakodo mana kodo juwijake, kou ko, ikii ajii tai mana kodo ikii maakodo gajake, ikii maija okai duba nijatogijawita Rohulkudus kodaa tegee kidojawita.

¹⁴Inii gowaitage agijo kodo Rohulkudus tiga niimijawita, inii needata mana puki kodo inii go-motiitageida to; okaija ajiipi bokouto kodo muta etuwai jatouga ko.

¹⁵Okai kouja, ikii Tuhan Jesus maakodo egata mana kodo ani juwijake, daana ikii jimubeu bagee utoma ipa egata mana kodo maija,

¹⁶ani te duwajake ikii maida make Ugatame muta etuwagoo, anija sembahjang tija gaa kiga-tojake.

¹⁷Iniija Tuhan Jesus Keristus Ugatame kidi kijaediimeete, kii ke, ajiipi bokouto jago Iniitai kidi, okai dimi bokouto Roh kodo kinijawe-tita, ikii ewaida keewijake okai kidi epi ketagouto to.

¹⁸Ikiija kegepa ka peka kijakadijawijake, kotopijawii dimi kodoopa mana kitita ikii gamake-tijake, daana okaija ka ugo uweuwe ma, agakato dani ma gowai agijo kodo, jimubeu bagee dubaiga.

¹⁹Dedaana inii maakodo gai bagee maida make okaija ka wo etige ka ibo bida agijo kodo;

²⁰okai Keristus duba kei tijawita ka umina wo etige bida agijo kodaa, okai bokata bagee jupi make eenigojawita gaa, daana okaija etikaato gebo eenimakita, epaawado.

²¹Etimake-tai bokouto ma, boko duwa-tai ma, bida agijo ma, ibo ma, utoma umina wo etige, daana eebatija ekaido utoma wo etige, kii makiida ka to ko beu kodeja, wado ka wagiida ka maija.

²²Tijake utoma agijo utoma okaija bado mijouto Ugatameja tagi jaatita, tijake maakodo gai uguupuguu maida make utoma agijo utoma migougu kidi jajaikita;

²³maakodo gai uguupuguu kodo okaija ma jato kodo, utoma agijo utoma epauto bokouto me kidi bokouto kodo.