Read Galela EPESUS 2 Bible Online

EPESUS 2 - Galela bible

EPESUS 2

¹Ikii ke tika bokata, ikiija peepu ma, peu kei tai ma dubaiga

²ume-wo tei tita gaa kodaa, kii makiida ka ijeidaiga, epa bede maki bede ka ibo kidi epeepeidaiga; kii ke, te juwe bagee kede duba kei teete roh kodo.

³Okei jupi inii utoma tika inii me ijeida kibigi dimiidaiga umei tita, má ma dimi ma kibigi dimi ekowajake; tijake inii ijeida ko kumi nigaja bagee, joko ka me jokaija kede danite.

⁴Kodeja Ugatame ipa dimi ugo uweuwe me kidi umina ipa nigajake

⁵inii peu duba boka-toojogo gaa maija, Keristus ma enaimo ija neewita; (jikoo bokouto kodaa ajii kitijawita).

⁶Tijake okai ma enaimo neenigojawijake okai ma enaimo epaawado oanimakai neewita, Keristus Jesus duba kodaa.

⁷Kou dani tijake wado ka uweike meike wagiido utoma okaija ka ugo uweuwe jikoo bokouto kodo emuwakeete, Keristus Jesus duba ipa nigajake.

⁸Jikoo bokouto kodaa ajii kitijawita, maakodo gaidaiga kodo; kou ko, ikiija ka kei tijake ko beu kodeja, Ugatameja ojaa kinita kodo;

⁹me ka kei tijaidaiga ko beu, me akaato kobidoke tai na kojoka.

¹⁰Inii ke okaija ka kei tijawita kouja, enaa agijo maida make Keristus Jesus duba niugajawita; enaa agijo wo ekowa-tijake, Ugatameja tika kodaa make epeepi tijawita.

¹¹Okai kouja ikii gai, ikii ojaa bagee kipajawita; iniitodo duwata wegaigai bagee ka ’duwai beu bagee’ keebatita, ebaidaiga gane ka kei tita kodo.

¹²Okai kou gaa kodaa ikii Keristus kidiipa make poto; ikii Israil uguupuguu maida make ojaa kede, ikii togijawita manaido kodo ewo bagee; ikii dimi kotopijawii beu tijake kii makiida Ugatame ma beu bagee.

¹³Kodeja ikii tika poto bagee kede ito Keristus Jesus duba kapa kimejawita, Keristusja emo kouja.

¹⁴Okai ki iniija muka-muka bokouto kidi; inii amo wija enaida neewita, inii jupi be akaga bedee kodo beu awijake.

¹⁵Kii ke okaija má jatouga Musaja dijo douja manaida kei tija manaido beu awijake; akaato duba amo wija kei ke ija ka me idaana ewaa awijake dagi nijaduwajawii.

¹⁶Tijake inii amo wija kede má ena dubaiga to Ugatame ma dagi nijaduwajawii, pija boko maidaiga, be akaga dimi kodo koudaiga beu awijake.

¹⁷Tijake ikii poto ka bageepa mejake dagi duwai mana kitigou, daana kapa ka bageepa maija.

¹⁸Kojoka inii kei tumaija kei ke okai maida to Roh enaidaiga to Iniitai kidiipa jawii.

¹⁹Okai kouja, ikii ito kou ojaa bagee ma, duwa jawe bagee ma, ko beu kodeja, jimubeu bagee ma enaimo ena gaa ka bagee, daana Ugatameja uguupuguu kodo.

²⁰Eti-awitaido ma, tikauwa ka mana wudei tita bagee ma makijawita kabouda kodaa wado kikatagijawita; Jesus Keristus kidi butu jato ka epauto mogo kabo makita.

²¹Okai duba migitaida puki akataka tijawijake, Ugatameja owaa Tuhan duba jimubeu kidi wado katage amo katage.

²²Okai duba ikii maija enaije kikatagijawijake Ugatameja totaida ke-tita, Roh dubaiga.