Read Galela EPESUS 4 Bible Online

EPESUS 4 - Galela bible

EPESUS 4

¹Okai kouja ani ki, Tuhan maida make nagadimimakita me kidaa kidiimai, mana kitita takaida utuutu kodaa ume-wo.

²Mijo kegepa awijake, daana debee kegepaidaiga, daana kegepa mijaanimakijake, ipa akaga to tai;

³Muka-muka manaidaiga Roh boda wagimakai mana kodo epeepite madagajawii.

⁴Má ena to, daana Roh ena to, ena to kotopijawita dimi kodoopa mana kitita kodo danite.

⁵Tuhan kidi ena to, maakodo gai ena to, baptis tai ena to.

⁶Ugatame kidi ena to, inii utoma Iniitai kidi, utoma agijo wado etige, daana utoma maidaiga, daana utoma duba.

⁷Inii nana nana jikoo bokouto nijaduwajawita, Keristusja ojaa niimita ebijadoudaiga.

⁸Okai kouja ugata mana ko: Okai wadouwe kita gaa kodaa okai ejakimakita bagee ejakimakai, Daana me jokaija kedeepa ojaa agijoudo menii.

⁹Okai wado uwita mana kou ko, beu, mee? edoga kidi makiida umina mijouwe kai.

¹⁰Mijouwe kita ka kidaa epa kabuudo utoma wado etige kita, utoma agijo utoma boko duwajawiine tijake.

¹¹Tijake me ino dani eti-awita bagee ke-tijake menii; daana ino ke gokobaki tijawiidaiga wega-tai, daana ino ke mana wude-tai bagee, daana ino ke mune-tai ma, etope-tai ma etijawita;

¹²jimubeu bagee kede dougai mougai jatijawiine tijake, kei te-tai agijo maida make ko, Keristusja má jato jakatagijawiine tijake.

¹³Inii utoma maakodo gai manaida boda wagijawiitageida to, daana Ugatame Joka epi ketagouda to; me dimi jago kijake Keristus boko duwadoke tita kidi danite, boko duwajawii.

¹⁴Kouda make ko joka to te to-tijake, e mana te mana ukija dani bukaa dokina tita, me ka go-mote ga-mote manaidaiga, daana kuba-mote manaidaiga me puja eukimakai,

¹⁵kodeja inii ke maakodo mana kodo ipa manaidaiga neejakimakai, tijake utoma agijo duba boko duwa-wo, migougu kidiipa to, kii ke Keristus kidi.

¹⁶Kouda make ko má puki kodo mani kumitaida kodaa akatawa tijake tine tineija kei tija epeepeidaiga, ipa dimiidaiga má jato kodo akaato maduwa-wado.

¹⁷Okai kouja ani kii dani kitii, daana Tuhan duba kega-kinii, ikii ito make wado ojaa bagee danite ume-wo te tai, wogidaa dimi epeepeidaiga kodo.

¹⁸Okeija dimi ko bunitamugu kita; ewoudaiga kegepa bida kouja okei Ugatameja ajii bokouto maida make poto.

¹⁹Kegepa bida kijake kikija epauto maida akaato ekegajawita; e peu te peu kei taine kibigi gaawe to tina.

²⁰Kodeja ikii Keristus maida make kou dani topii beu tita;

²¹kou danite ikii ejuwi-toojogo ko, daana okai duba kitopitoojogo, maakodo bokouto kodo Jesus duba boko duwajawii kodo danite.

²²Ikiija ka tika ka umei tita ka ijee kodo betamigii; puja kiukai kibigi dimiido ka peu kita kodo.

²³Tijake ikiija dimi mana ija awijake

²⁴ija ijee makii, Ugatameja ijeidaiga komugajawita, maakodo bokouto puki kodo ma, daana jimubeu puki mana kodo ma.

²⁵Okai kouja puja mana wegai ko jamo jaikai, tijake aki watija bageepa maakodo mana oowegai, inii kede má ena ka tineija kouja.

²⁶Emoge gai kodeja peu te kei tai; ikiija emoge dimi kodo meuka mijoujo kaida to taawii.

²⁷Teege touda te jajaikai.

²⁸Oma motei tita me kidi oma wado te motii; kodeja okai kidaa gane ka enaa agijo kei tai, agijo beu bageepa oowude-tijake.

²⁹Ikiija ebeida make peu mana te godajawii kodeja okai kou wagiida ka enaa mana kodo, me bo jawejawija mana kodo, juwii bagee kede epaago ke-tijake.

³⁰Daana Ugatameja jimubeu Roh kodo duwaa-duwaa te etijawii; okai maidaiga ikii tegee kidojawita, kipipikajawii putuuda to.

³¹Utoma ka digi edokai, emoge, boko, akaije, me eduwai, kei ke ikeepa make uwo menii, daana me peu eewii dimi utoma.

³²Ikii kede kojáá kojáá akaate tai, debee kegepa jago; ikii kede ipa akajaiki tai, Ugatame maija Keristus duba ipa kijaikita danite.