Read Galela EPESUS 6 Bible Online

EPESUS 6 - Galela bible

EPESUS 6

¹Ei, jokaane, ikiija ukaane nakaane Tuhan duba ejuwidoke tai; kou ko enaa kojoka.

²Akaitai akuukai ibo ejaikai; kii ke edoga nitimakita mana togijawita mana ma tawajawita kodo:

³aki enaa ke-wo te-tita, daana makiida ume-wo te-tita.

⁴Ei, nakaane, ikiija jokaane kede emogaago taawii; kodeja Tuhanja manaidaiga pidou pidou etopijakeidaiga emunai.

⁵Ei, ikii me ka bida peu kijakimakita bagee kede, ikiija ka makiida ka ibo kedeepa ejuwidoke tai, weda ma pigi-pigi ma tijake, kegepa doodoudaiga, Keristus kidiipa danite;

⁶me pekaida to ko beu, me ka juma dege-dege etaine tijake; kodeja Keristus jakei te-tai bagee kede danite, kegepa puki ka Ugatameja dimi kei teete.

⁷Ideideidaiga kei teete, Tuhan kidiipa danite, meepa ko beu.

⁸Me ka enaa kei tita agijo kodo Tuhan abu japaitagi gajake, ejakimakita me kipi maija, ojaa tou me kipi maija.

⁹Ei, ikii etimake-tai bagee, ikii na kii kidi, wedaago te etijake, okei ma ikii ma kitimake-tai Ibo kidi epaawado topi kijoka gajake, daana kii kidaa me ebepeka ewitokai beu me kidi.

¹⁰Muumai jago kodo, Tuhan duba bida kiwei, okaija ka umina bidaidaiga kodo.

¹¹Ugatameja japeepa dougai mougai agijoudo utoma tigii timakai, Teege ka go-mote ga-mote manaido utoma ikii akanakuu oote-tijake.

¹²Inii me tuma akanakuu ootai beu kouja; kodeja ibo agijo ma, bida agijo ma, daana kii makiida ka bunita kodo boko duwajawe-tai ma, daana epa bede maki bede ka peu roh bokouto daniido.

¹³Okai kouja Ugatameja japeepa ka dougai mougai agijoudo utoma tigii timakai, peu naagouda kodaa ikii bida peu tomaketita, daana utoma agijo kei timakijake joonidoke te-tita.

¹⁴Okai kouja bida peu kidi joonidoke tai; maakodo bokouto kodo ikiija ka piti tagi atii, daana enaa bokouto kodo ikiija boko maida toopu pajo;

¹⁵daana bado maida dagi duwajawija ajii mana kodo epeepi tai mana kodo awijawii,

¹⁶daana umina kodo maakodo gai kodo toopu pajo kodo dokii; peu bokouto kidi bodija wii mapega dinijawii agijo kodo.

¹⁷Ajii bokouto kodo migo egaupai, daana Roh kodo kataana dokii, kou ko Ugatameja mana kodo.

¹⁸Utoma wagiida Rohdaiga sembahjang ma, ediimai ma to tigoo. Okai kou manaida utoma ekowaidaiga doutou ma, jimubeu bagee utoma sembahjang ejaki-tojake.

¹⁹Daana ani maija sembahjang natai, ani mana godaine gaa kodaa mana kodo naime-tijake, ajii mana boone-boone mana kodo ewaida awiine tijake.

²⁰Ajii mana maida make ani ki nagadimimakita ka nabadikumita me, ani kou manaida uu peu kidi mana wega-tita, ani wegaja kodo danite.

²¹Ani topa gaa kodo daana kei teete agijo kodo ikii ga-tijake Tichikus kidaa utoma agijo kiti-kiniitagi. Okai ki noogei didé kidi, daana Tuhan maida make enanauto jakei te-tai kidi.

²²Okai kou maida make ani ikeepa kijaebadikumii, inii kawe dani tope ko ikii ga-tijake, daana ikiija kegepa kijamaipajawetijake.

²³Enakeneka bagee kede muka-muka tou, daana ipa dimi kodo maakodo gai ma enaimo gou, Iniitai Ugatameepa make, daana Jesus Keristus kidiipa make, e boko te boko nijaduwa-tai me kidi.

²⁴Iniija Tuhan Jesus Keristus kidi imo to togoo ei egai bageepa jikoo bokouto jaduwajawii enaa.