Read Galela PILIPI 1 Bible Online

PILIPI 1 - Galela bible

PILIPI 1

¹Paulus ma, Timotius ma, Keristus Jesus jakei te-tai bagee kedaa, Pilipi makiida ka Keristus Jesus duba ka jimubeu bagee utoma, daana maakodo gai uguupuguu douto-tai ma, eedadetai ma, kedeepa kapogeije kijamakii.

²Kou danite Iniitai Ugatame ma, Tuhan Jesus Keristus ma, ka jikoo bokouto ma, muka muka bokouto ma, boko kijaduwajawii.

³Ani kiga-tou tija gaa kodo anija Ugatame kidi ani nagajaweege etii;

⁴ani sembahjang kitai gaa ani ideide ma sembahjang kijakitou,

⁵ajii manaida ikii akagadime kodo maida make, edoga naago make ito to utuuja.

⁶Ani epaapa timakai mana kodo ikii duba enaa agijo ookajawita me kidaa kii kidi boko kijaduwajawiitagi, Jesus Keristusja putu naagouda to.

⁷Ani kou dani ikii maida make gai ko enaa, anija kegepa duba ani kijaki-tou kouja, ikii utoma ani ma enaimo jikoo bokouto kodaa akagadime tai kouja, ani bida peu najakimakita manaida ma, daana ajii mana wo wegai ma, boko duwajawii ma, manaida kodaa.

⁸Ugatame epi ani ikii kogaa umina, Keristus Jesus kidaa ipa kodo ma.

⁹Ani sembahjang kijaediimai mana ko, ikiija ipa dimi kodo abuma ke-wo te-tita, epi ketago ma, dimi boko ma, manaida kodaa.

¹⁰Ikii epauto manaido ga-tijake; tijake Keristusja putu naagouda to ikii jimubeu anaani beu kidi ke-tita.

¹¹Maakodo bokouto ka gojawita uta kodo wo godaa tijake, Jesus Keristus kidiidaiga, Ugatame ajiipi gojake muta etuwai jatouga.

¹²Ani ide ikii gai, ei, noogeimaido, ani maida makeenita manaido kodaa ajii mana ita kodo wo wadii.

¹³Ani najakimakita mana kou ko Keristus kidi maida make ewaida kouja, douto-tai serdado kedeepa, daana joko ka bageepa maija.

¹⁴Tijake enakeneka bagee wedaba Tuhan duba epaapa timakai, ani najakimakita mana maida make, tijake Ugatameja mana kodo euga uu peu kidi wo wegai.

¹⁵Maakidi, me ino digi edokai ma, akaije ma tijake Keristusja mana kodo wegai, daana me ino ko kegepa doodoudaiga.

¹⁶Kei ke ipa maida make kei tai, ani ajii mana kodo wo wegatijake najaikita gajake.

¹⁷Kodeja joko ka kede akaije manaida, daana doodoo beuda kei tai, gaagaa natijawiine tijake, najakimakita maida make ko.

¹⁸Kii takaida kou takaida matabe kipa maija, doodoo kipa maija, Keristus mana kodo wudikumita. Ani kou manaida kodaa ideide. Beu maa kou, ani ideide to taita.

¹⁹Ani epi kouja, ikiija ka sembahjang maidaiga, daana Jesus Keristus Roh naadadijake ko, kou mana kodo betokijake ani napipikajawii mana kaita.

²⁰Ani ei gajake dimi kotopijawii kodo danite, tumaana agijo duba ma ego te gaine tijake, kodeja kegepa gouda mijaato kodo danite ito maija ani duba Keristus kidi ajiipi agijo go-tita, ume-wo kipa maija, bokapa maija.

²¹Ani ki ume-wo ko, Keristus kidi kijoka, daana bokai ko epaago.

²²Ani me má tojake ume-wo tipa ko, anija kei tai agijo kodo uta go-wo. Kodeja witokai ko ani ewo.

²³Kei mana wija kei ke ani duwaa-duwaa. Ani uwijake Keristus ma enaimo aakai ide kodaa. Kou ko umina enaa kojoka.

²⁴Kodeja me má tou ko ikii epaago keewii.

²⁵Kou dani gajake ani epi ani tojake ikii utoma keetouta, ikii maakodo gai manaida enaa ke-wo tijake ideide te-tijake.

²⁶Ani maida make ikii Keristus Jesus duba ideide te-tijake, ani kigeena ma kidou jawijake ko.

²⁷Ikiija ka ume-wo kodo Keristusja ajii mana kodo ma utuutu tijawii, ani kidou jawipa maija, ikeepa beu kipa maija, ikii ena kegepa akagadime tijawijake bo wemakai mana kodo ani ikii maida make juwe-tita; ajii mana maakodo gai maida make ko ena dimiidaiga woowii;

²⁸tumaana agijo maida make akaije kitai bagee kede weda te egajake; kou ko okei peu kaine tegee dou agijo, kodeja ikiija ka ajii tai tegee edou ko, epauto ko Ugatame.

²⁹Keristus maida make kinita kou ko, maakidi egai to ko beu kodeja, okai maida make didi gaduwai kodo maija.

³⁰Kou ka gaduwai kodo naagaduwajake, ani maida nadootega ka kodo, daana ito maija topa ikii juweiga kodo.