Read Galela PILIPI 2 Bible Online

PILIPI 2 - Galela bible

PILIPI 2

¹Kou dani tijake Keristus duba jeu jeu mana ewaa ki-toojogo ko, daana ipa manaida dimi maipajawi-toojogo ko, daana Roh ma akagadime ti-toojogo ko, daana jikoo peu kidi ipa akaga ti-toojogo ko,

²anija ideide dimi kodo boko naduwajawii, ikii ena dimi awijake; ena kidi ipa akaga tiwei; ena kegepa, ena dimi awijake ko.

³Akaato kidi to gajake tumaana ma te kei tai; juwa, nadodowei dimi gajake ko juwa; kodeja akaato kidi daba gajake akaato kidi ma ko ino ka bagee enaa egai.

⁴Me gakita akaato to te gajake me ino maija egai.

⁵Kii dimi ki ikiija ka kegepa duba amoujo awii, Keristus Jesus duba tota ka kodo.

⁶Kou ko, okai Ugatame ida kidija Ugatame ma utuutu kodo jipugai beu.

⁷Kodeja akaato kidi tapa atijake bida peu ejakimakita me ijeida kijake me ida kita.

⁸Tijake me ida kijake ko akaato daba awijake juwidoke teete ko bokaida to, kou ko, pija boko maida bokata kodo.

⁹Okai kouja Ugatameja umina wado etige etijawijake, utoma eka wadouto monika eka eebatita,

¹⁰Jesusja ekaidaiga ko utoma kagu donimake-tita, epaawado ka ma, makiida ka ma, daana maki mijouto ka ma;

¹¹tijake eta gakita goda-tijake, Jesus Keristus kidi ki e boko te boko duwa-tai me kidi, Iniitai Ugatameja ka ajiipi bokouto kodo maida make ko.

¹²Okai kouja, ei, noogei dideemaido, ikii ejuwidoke teiga kodo danite ito maija, ani tojake to ko beu, kodeja umina ko ani beu gaa kodo, ikiija ka ajii tai kodo weda ma totome ma ekowa-motii.

¹³Ugatame kidaa ikii duba ekowa-motii kouja, okaija ka gata dimi kodo gai ma, kei tai ma, maida make ko.

¹⁴Kitigi motigi ma, akaije akaije ma, beu kodo utoma agijo kei tijawii;

¹⁵ikii anaani beu kodo kegepa doodoo Ugatame jokaane jimubeu ke-tita, kii keenidaa betokidaa tuma jupi; kou jupi ikii kede awee boko dani bukaa makiida ganimakai;

¹⁶ajii tai epauto mana muto kodo jaki-tojake. Ani Keristusja putu naago kodaa ani kobidoke te-tita, anija ume-wo ma, ekowai ma, wogidaa kai beu kouja.

¹⁷Ikiija Ugatameepa ekegajawii ka maakodo gai kodo maida make anija emo ko nauwikumi-toojogo maija, ani ideide tijake ikii utoma enaimo ideide tai.

¹⁸Okai kou dani ikii maija ideide tikumijake ani ma ideide neetai.

¹⁹Ani Tuhan Jesus maida dimi ekotopijawii, egaa kodaa Timotius kidi ikeepa ebadikumiine, ani ikii maida make mana juwijake ko ani ideide te-tita.

²⁰Ani okai dani meena ma beu topa, ikii maida make maakidi gaagaa taitagi me.

²¹Okei utoma okeija ka manaido to wado gai-gai, Jesus Keristusja manaido ko beu.

²²Kodeja Timotius kidi enanauto kidi ikii epi, jokame idaana nakame ma enaimo ajii mana maida make nakei tijawii.

²³Kojoka ani egaa kodo ebadikumiine, ani maida kaita mana dojake ko.

²⁴Tijake ani Tuhan maida dimi ekotopijawii, ani kidi maija egaa kodo ikeepa jawii juwa taita.

²⁵Noogei Epafroditus kidi ikeepa ebadikumii beu kai peu gaaga, ani ma nakei te-tai kidi, daana japeepa naato-tai kidi; ikiija ka naaebadikumijake naadadita me kidi.

²⁶Ikii utoma okai kogaa umina kigai kouja, tijake okai didi tita mana kodo ikii juwii kouja okai gaagaa.

²⁷Maakidi okai didi umina bokaine dani. Kodeja Ugatame ipa egai, daana okai to beu kodeja ani maija, anija gaagaa kodo abuma ke-wado na kojoka.

²⁸Kojoka ani ideide umina ikeepa kijaebadikumii, ikii edojake ko ideide te-tita, daana ani maija gaagaa beu kaita.

²⁹Kojoka Tuhan duba ideide ma ejakimakai; kei dani ka bagee ibo ejaikai.

³⁰Okai Keristusja kei tai agijo maida make bokai ijeida, ikiija ka naadadai maida make ko dimi mana ekegajawijake.