Read Galela PILIPI 4 Bible Online

PILIPI 4 - Galela bible

PILIPI 4

¹Okai kouja, ei, noogei dideemaido, anija kogaa kigata bagee kede, anija ideide bokouto ma, anija petege ma, Tuhan kidi duba bo wemakai, ei, noogei dideemaido.

²Ani Eiodia ma, Sintiche ma, ediimai, Tuhan duba ena dimi aakepajawai.

³Dedaana aki maija, ei, ani ma inu naatii kidi, kou jagamouja eedadai, ani ma enaimo ajii mana maida make kode kigii tita kodo, Kelemen kidi maija, daana joko ka noogeima, ajii kapogeije duba eka ebijata bagee kede.

⁴Umina kidi Tuhan duba ideide tiwei; daana kigeena ma kitiine, ideide to tiwei.

⁵Ikiija debee kegepa me utoma kidou enaa; Tuhan kapauto topi.

⁶Tumaana agijo maida make gaagaa te tai kodeja utoma agijo duba ikiija gaja dimi kodo Ugatameepa sembahjang ediimijake ekega-menii, nigajaweege dimi ma.

⁷Tijake Ugatameja muka muka bokouto wegai ma peu kodo ikiija ka kegepa ma, dimi ma, Keristus Jesus duba kimadagajawiita.

⁸Muumai jago, ei, noogeima, maakodo ka agijoudo ma, enaa ka ma, jimubeu ka ma, jikoo ka ma, juwii enaa ka ma, enaa agijo topa keetigo ko, daana muta etuwaja keetigo ko, kou kodo dimi tadu atii.

⁹Ikii aneepa make topii ma, jakimakai ma, juwii ma, dou ma, agijoudo okai kou kodo wo kei tai; tijake muka muka bokouto jago Ugatame kidaa keetoutagi.

¹⁰Ani Tuhan duba ideide umina, ikii kigeena ma wado nagadoke kouja; maakidi, mijaato maija ikii naga-tou, kodeja kei tija wagi beuda.

¹¹Ani agijo tagu wegai ko beu, ani topa gaa tiki no gai mana topi-moteetega kouja.

¹²Ani puku puku na epi, abuma abuma na epi; utoma agijo duba utoma wagiida ani topimakai, mobu kipa na, naidi kipa na, abuma kipa na, beu kipa na.

¹³Bida naawii me kidiidaiga ani utoma agijo utoma kei timakija.

¹⁴Kodeja anija gaagaa kodo ikii gaagaa naateetega kojoka enaa.

¹⁵Daana ikii Pilipi bagee epi, edoga ajii mana wudii gaa ani Makedonia make podomijake ko, ino ka maakodo gai uguupuguu ani ma enaimo akamene akamote mana nakei tijawii beu, kodeja ikii kede to.

¹⁶Ani Tesalonika tootega gaa maija ikii kigeena wageena anija gai peu maida make naamakita.

¹⁷Ani naimija agijo ubai ko beu kodeja, ikii epaago kitijawii uta kijaubai.

¹⁸Ani utoma moteetega; beu maa kou, abuma. Ani mobu, ikii Epafroditus maidaiga naamakita agijoudo ani motijake ko; unu enaa ka ekega-menii agijo, Ugatameja juma dege dege etijake motija ka ekega-menii agijo.

¹⁹Ikiija ka gai peu agijo utoma anija Ugatame kidaa tiki tiki kijatijawiitagi, okaija ka ugo uwe-uwe ajiipi bokouto epeepeidaiga Keristus Jesus duba.

²⁰Ajiipi bokouto kodo Iniitai Ugatame kidi ipuwe kii kidi imo to togoo. Amin.

²¹Keristus Jesus duba ka jimubeu bagee me gakita kojáá tou kiteegi naaetii. Daana ani ma enaimo ka enakeneka bagee kojáá tou kiteegai.

²²Jimubeu bagee utoma kojáá tou kiteegai, epauto ko Kaisar owaapa ka bagee kede.

²³Tuhan Jesus Keristusja jikoo bokouto kodo ikiija ka roh ma keetou to.