Read Galela KOLOSE 2 Bible Online

KOLOSE 2 - Galela bible

KOLOSE 2

¹Ani ide ikii gai kodo, ani ikii maida make umina woowii kodo, daana Laodikia bagee maida make, daana ani ebepeka nadou beu bagee utoma maida make.

²Okeija kegepa tipinimake-tijake, ipa akaga manaida akatawa timakijake; gamakijake epaapa timake-tita; daana Ugatameja boone boone mana, Keristus kidi, epi ketagouda to.

³Okai duba dimi boko ma, epi ketago ma, ugo uweuwe manaido utoma boko duwajawita.

⁴Ani kou dani kitii, me ka deega deega manaida wo kigojawii na kojoka.

⁵Ani má jatouga ikeepa beu kodeja, kegepaidaiga ikeepa tojake ideide tai; ikii epeepi timakai ma, Keristus bida peu kidi maakodo egai ma, kidojake ko.

⁶Ikii Jesus Keristus e boko te boko duwa-tai me kidi ejakimakeetega danite, okai duba ume-wo;

⁷mani mijo wejawijake okai duba pigu tai, maakodo gai kodo boko duwajawijake, kitopita kodo danite, nigajaweege dimi edidaa tijawijake.

⁸Me ka gajaidaiga utoopa kiukai manaida kijakimakai na kojoka gai, me ka kuba-mote manaidaiga, makiida ka epauto manaido epeepe, Keristus epeepeidaiga ko beu.

⁹Okai duba Ugatameja bokouto kodo má jatouga ume-wo;

¹⁰tijake okai duba ikii ke boko kijaduwajawii. Okai ki e bida te bida, daana e boko te boko migougu kidi.

¹¹Okai duba ikii iniitodo kiduwata, gane ka duwai mana ko beu, kodeja Keristusja manaidaiga me peu ijee kodo kijaduwajawijake.

¹²Ikii okai ma enaimo baptis tai manaidaiga oka kimakita, tijake kou duba okai ma enaimo keenigojawita, bokata bagee jupi make eenigojawita Ugatame kidi kei tai agijo maakodo gamakijake ko.

¹³Ikii ke dijo beebu titaida ma, má jato duwai beuda ma, bokata bagee kede Ugatameja okai ma enaimo ija keewita, iniija dijo beebu titaido utoma ipa nijaikijake.

¹⁴Inii akaije nitita ka ebijata mana kodo nijawunakumijake, mijo nitagimimakita manaido kodo, tijake ineepa make nijadoke-uwita, pija boko maida wagijawijake.

¹⁵Ibo agijoudo ma, bida agijoudo ma, bida beu awijake ewaidaiga kegei kegei jatijawii; pija boko maidaiga okei maida petee kijake.

¹⁶Me ka ti kiwidogai, naija agijo maida make juwa, ibo naago maida make juwa, agoo ewaida keigi gaa maida make juwa, Sabbat naago maida make juwa ko;

¹⁷kei ke meitai manaido ajá kodo to kodeja mana puki kodo Keristus kidi.

¹⁸Me ka ikiija petege kijabokome-tijake te ejaikai; akaato daba awijake manaidaiga ma, jaetigo-tai bagee migaakobe etaidaiga ma; tijake dota manaida pigu atijake me ka utoopa dimiidaiga kobidoke tijake, wogidaa na kojoka.

¹⁹Tijake migo kidi bida peu ejakimakai beu; migo maidaiga má idima kumijawita maniido ka dougai mougai ma, akatawa ma, timakijake maduwa-wo, Ugatameja maduwajawiidaiga.

²⁰Ikii Keristus ma enaimo makiida ka epauto manaido maida make boka-toojogo ko, ikii kawe dani tijake makiida ka manaidaiga ume-wo tija? Magijo ka kei manaido dijo dou? Kou ko,

²¹„Te jakii, igi te wagidou, winiki te tai,” manaido kodo.

²²Kei tijake beu kai agijoudo kei ke; me ka kuba-mote mana etopai kodo.

²³Kei manaido dimi boko jago puga, akaato gajaidaiga migaakobe tai manaidaiga ma, akaato daba ejaikai manaida ma, akaato tine peepu ma, kodeja kei utoma epa beu to, me ijee kodo mobu eewii to.