Read Galela 2 TESALONIKA 3 Bible Online

2 TESALONIKA 3 - Galela bible

2 TESALONIKA 3

¹Muumai jagouda ko, ei, noogeimaido, sembahjang nijakimakai, Tuhanja mana kou ko wo gamedaa tikumijake ugo uwidoke te-tita, ikii jupi kodo danite.

²Daana utoopa ma peu ma bageepa make inii pipikadaa te-tita, me utoma maakodo gai ko beu kouja.

³Kodeja Tuhan kidi enanauto; okai kidaa bida keewijake peu bokouto maida make kimadagajawiitagi.

⁴Tuhan duba inii ikii maida dimi kotopijawii, iniija kiteetege mana kodo ikii kei tijake kei te-wado taita kigajake.

⁵Tuhan kidaa ikiija kegepa ko Ugatameja ipa dimi maida tadu kijaatii, daana Keristusja pigu tita dimi maida maija.

⁶Ei, noogeimaido, iniija Tuhan Jesus Keristus kidi eka duba kitimakai, maje-maje enakeneka bagee maida make ikiiniinii kai; ineepa make topita mana te jakimakai bagee kede.

⁷Iniija komuga kineetege kodo neepeja no! gajake. Inii ikii jupi maje-maje ko beu kouja.

⁸Daana inii me ka naija agijo utoopa to nai ko beu; kodeja wanee agapi ee ma kaga ma umina kei tai, ikii me idaana ma gaagaa ti kitijawiine tijake.

⁹Inii kou dani to kei tija kouja ko beu kodeja, inii komuga kiniine tijake ikii neepe-tita.

¹⁰Inii ikeepa tootege gaa kodaa kii mana muto kitimakeetege: Me idaana te kei ti-toojogo okai te nai maija.

¹¹Ikii jupi me wija wido utoopa maje-maje mana inii juweemege kouja, wedege wudugu to tigoo tijake kei tai beu.

¹²Kei dani bagee inii Tuhan Jesus Keristus duba etimakai, okei kojáá peu na ki kei tai, daana okei kedaa naija agijo nai.

¹³Kodeja ikii ke, ei, noogeimaido, enaa kei tai agijo odoo te kai.

¹⁴Kii kapogeije kijaebijata mana kodo me idaana te juwitoojogo, kii me kidi egamakijake okai ma takadega te tai, okai ego ga-tita.

¹⁵Jape me taawii, kodeja enakeneka danite mana etopai.

¹⁶Muka-muka bokouto jago Tuhan kidaa utoma takaida umina kidi muka-muka bokouto kijaduwajawii. Tuhan kidi ikii utoma keetou to.

¹⁷Ani ki Paulus kidi ani kidaa gane ka kojáá tou kitii. Ani ebijata kapogeije utoma tegee nadou; ani kou danite ebijaiga.

¹⁸Kou danite iniija Tuhan Jesus Keristus kidaa ikii utoma jikoo bokouto kijaduwajawii.