Read Galela 1 TIMOTIUS 2 Bible Online

1 TIMOTIUS 2 - Galela bible

1 TIMOTIUS 2

¹Okai kouja edoga kidi ani katii mana, me utoma maida make jaediimai, sembahjang ejakai, daana okei maida make nigajaweege mana kodo godajawii.

²Maki jakimake-tai bagee utoma maida make, daana makiida ka iboudo utoma; inii muka-mukaidaiga umi-tou te-tita, dijo douja ko enaa dimi manaidaiga.

³Kou ka kou ko enaa, daana Ugatame ajii bokouto nijaduwajawita me kidi juma dege-dege nitai;

⁴utoma bagee ajii tai go-motijake maakodo bokouto gamaketita no! gata me kidi.

⁵Ugatame kidi ena to kouja, daana Ugatame ma me ma utuuja ka me kidi meena to; kii me tuma kii ke Keristus Jesus kidi.

⁶Utoma bagee epipikajawiine tijake akaato ekegajawita me; kou ko putu gaa kodaa wo wegata.

⁷Daana okai kou maida make ani ki mana wega-tai ma, eti-awita me ma naawita (ani maakodo kateega, puja beu); maakodo gaja ka maakodo bokouto mana kodo ojaa bagee etope-tita.

⁸Okai kouja anaa gai ko, jameido me gakita kiida kouda sembahjang tai, jimubeu gane kagajawijake, emoge ma akaije ma beu kidi.

⁹Kou dani maija jagamoudo utoma gaagoona kidi makii, ipouje, enaa dimi manaidaiga; ijo keedo-peedo juwa, mas juwa, mutiara juwa, ibaage ka kagaba juwa, te makijake.

¹⁰Kodeja enaa kei taidaiga, Ugatameepa dijo do-tai jagamo ka kei tija danite.

¹¹Jagamoudo gaboudaiga topijake juwidoke tai.

¹²Jagamo idaana ma jameepa etopai juwa, okai maida bida juwa, ani te ejaikai, kodeja okai gabo tou to.

¹³Adam tiga ewaa awita kouja, tijake wadoutouga Hawa.

¹⁴Daana Adam kidi eukimakita ko beu, kodeja jagamo kodo puja eukita, tijake peu duba bogi tita.

¹⁵Kodeja joka pamakita maida make ko okai enaa kaita; okai maakodo gai ma, ipa dimi ma, jimubeu ma, bo wemaki-toojogo, enaa dimiidaiga.