Read Galela 1 TIMOTIUS 3 Bible Online

1 TIMOTIUS 3 - Galela bible

1 TIMOTIUS 3

¹Kii ko maakodo mana: Kou danite me idaana maakodo gai uguupuguu tuku tuku me kaine gapi, okai enaa kei tija agijo gamakita.

²Okai kouja, maakodo gai uguupuguu tuku tuku me kidi anaani beu ka kidi; kii ke jagamome idaana to; akaato domakai, ipouje, enaa kei tija ijeida, me oumidokii enaa gai, me etopai epi.

³Utaadijo uneune ma, boko jago ma ko beu, kodeja debuu kegepa jago me, akaije akaije beu; mege kibigi beu.

⁴Kodeja okai kidaa uguwo epeepite domakai, daana okai kidaa jokaane emuneete, okai to edo-motii kouja ejuwidoke to tai.

⁵Me idaana okaija uguwo edomakai ewo ki-toojogo ko, kawe dani tijake Ugatameja uguupuguu doutomakija?

⁶Ito kidi mana jakimakita me ko beu, okai ibo puga gajake Teege ka peu eewidoke na kojoka.

⁷Daana ojaa bagee ka enaa egata me, peu kei tijake Teege ka bokeida gadi tidoke na kojoka.

⁸Kou danite maakodo gai uguupuguu eedade-tai bagee maija dimi enaa kai beu kai peu. Eta taka wija te kai; utaadijo maida tadu taatii; bokomi-moteidaiga ka bago kaine ko beu.

⁹Maakodo gaja boone-boone mana kou ko enaa dimi duba jakimakijake.

¹⁰Daana kei bagee kede egaado tiga tijake, anaani beu edomaki-toojogo okei maakodo gai uguupuguu eedade-tai bagee kidaa tai.

¹¹Okai kou danite jagamaaneido maija enaa dimi jago, me te eduwai, kodeja akaato domakai, daana utoma agijo duba enanauto egata bagee.

¹²Maakodo gai uguupuguu eedade-tai me kidi jagamo idaana to bukijake okai kidaa jokaane ma okaija uguwo ma epeepite domakai.

¹³Eedade-tai mana epeepite kei tita bagee kidi ki epaago epa kai, daana Keristus Jesus maakodo egai manaida awee kadee.

¹⁴Akeepa egaa jawiine kodeja kii kapogeije kaaebijai, tijake

¹⁵ani ipee tipa ko, Ugatameja uguupuguu duba kei tija kei tija mana aki ga-tijake. Kou ko ajii ka Ugatame kidaa uguupuguu kodo, maakodo bokouto mana kodo epaakabo ma, kemoma ma.

¹⁶Iniija maakodo gata ka boone-boone mana ko mana ketago. Okai me má jatouga nimuwakita, Roh kodaa maa no! jawegata, Jaetigo-tai bagee ka edota, Me tuma tumaija jupi ugo uwikumita, Makiida kiija maakodo egata, Ajiipi duba wado ebuki-motita.