Read Galela 2 TIMOTIUS 2 Bible Online

2 TIMOTIUS 2 - Galela bible

2 TIMOTIUS 2

¹Okai kouja aki ki, ani joka, Keristus Jesus duba ka jikoo bokoutouda bida peu kai.

²Me wedaba pekaida aneepa juweetege manaido kodo enanauto bagee maida jadokijawii; joko bagee etopija bagee kedeepa.

³Keristus Jesusja enaa serdado danite gaduwaja kodo naagaduwai.

⁴Japeepa ka serdado idaana ma ojaa mana ka dimi kodo wo te go-motija, serdado ke-tijake ewitoki-motita me kidaa juma dege-dege ete-tijake.

⁵Daana akagaado teeteida ka bagee kede petege te jaweja, kodeja kei tija epeepeidaiga to kei ti-toojogo to.

⁶Ee ma tai te-tai bagee okai tiga uta duwaja.

⁷Ani kateega mana utoma gai; Tuhan kidaa utoma agijo boko peta-kaniitagi.

⁸Jesus Keristus Daud epaida kidi gai, bokata bagee jupi make anigota kidi, anija ajii manaida pitokita kidi.

⁹Daana okai kou maida make ani didi gaduwajake buda nagadimimakai, ani peu bagee jaijo. Kodeja Ugatameja mana kou ko te gadimimake.

¹⁰Okai kouja, ewitokita bagee maida make ani didi gaduwagoo to, Keristus Jesus duba okei ajii te-tita, imo to togoo ajiipi duba ko.

¹¹Kii ke maakodo mana puki: Inii okai ma enaimo bokape ko, Okai ma enaimo ajii tai kodo.

¹²Inii didi gaduwape ko, Okai ma enaimo maki jakimakaitage. Inii beu puga etipe ko, Okai na beu puga nitaitagi.

¹³Inii ena peu kipe ko, okai enanaa tou to, Okai akaato beu puga te timake kouja.

¹⁴Kei manaido meepa ga-menii, daana Tuhan pekaida epeepite eti-menii, mana muto maida akaije akaije te te-tita, epa beu manaido ko, juwija bagee peu awe-tai manaido kodo.

¹⁵Ugatame pekaida juma dege-dege etijawii me kaine tijake ekowa-motii, ego te gaja ka jakei te-tai me kidi danite, maakodo mana kodo pidou pidou wegai.

¹⁶Kodeja peu mana wegaa-wegaa kodo jamo jaikai, me euga peu ke-wo kouja.

¹⁷Okeija ka mana muto kodo pigupode no-no-wa-wa dani bukaa; okai kou dani bagee Himeneus ma, Piletus ma.

¹⁸Maakodo mana maida make uneune tidaa tita; kou ko bokata bagee anigou mana kou tika muumai tita mana etopai. Tijake me wija wido maakodo gai maida make wo keenidaa betokidaa tita.

¹⁹Kodeja Ugatameja kabo makita kodo pigu tijake tou to, daana kii dani mana tegee edota: Tuhan ipuwe bagee okai epi. Daana kii dani maija: Meija Tuhan eka eebatipi, peu maida make okainiinii kai.

²⁰Ibo owaa duba maa ma, perak ma ebijata tapuja to ko beu, kodeja pija ma, maki ma; ino ko dou diiti, daana ino ko utoopa to.

²¹Okai kouja, me idaana utoopa maida make akaato witogipi, dou diiti tapuja kidoke tai, jimubeu eewita, okaija ibo kidaa kei te-tita; enaa kei tai agijo maida make wo epeepi timakita.

²²Kodeja jokaagaa ka kibigi dimi maida make okii to tai; tijake maakodo bokouto bopi kepai, daana maakodo gai ma, ipa dimi ma, muka-muka ma, jimubeu kegepaidaiga Tuhan eka gee etita bagee utoma enaimo.

²³Kodeja dimi beu ka wegaa-wegaa wogidaa mana jamo jaikai; kou ko akaije gomakai mana kouja.

²⁴Daana Tuhan jakei te-tai me kidi akaije te tija, kodeja utoma bageepa jikoo kai; me etopai epi, daana gaagaa duba kegepa mijaanimakai.

²⁵Kojaa peu kidi akaije ootai bageepa mana oowegai; kou danite Ugatameja tedemai dimi menijake maakodo bokouto epi kai, mee? titaida ka.

²⁶Tijake Teege ka bokeida make petii tijake mobu kai, okaija dimi kei te-tita bokeida ejakimakita me kidi.