Read Galela 2 TIMOTIUS 3 Bible Online

2 TIMOTIUS 3 - Galela bible

2 TIMOTIUS 3

¹Kou mana kodo gai! Wiwitiida gaa kodaa peu uwa potu taita.

²Me utoma akaato dimi to gai kouja, mege kibigi gai ma, akaato ibo awii ma, kobidoke ma, widoge-widoge ma, ukame nakame te ejuwai ma, nagajaweege dimi ko beu, dijo beebu,

³ipa beu, dagi duwai ko be, me ewegai, utoopa wo uwe, boko peu, enaa agijo ide beu,

⁴me euwajawii, dimi pini, ibo puga, Ugatame ei egai dimi aadaba tijawijake ideide to wo ubai.

⁵Dijo doote puga tijake bida bokouto ko jamo jaikita; kei dani bagee jamo kigi atii.

⁶Kei dani bagee gaboudaiga me ka owaapa wadoujo kijake dimi beu jagamo egodoke uwii; okei peu kei tai agijo udo kugo dokita; okeija kii agijo kou agijo kibigi gaidaiga edokina tita.

⁷Okei topigoo te-tai kodeja maakodo mana gamakai ko beu.

⁸Jannes ma Jamberes ma Musa akaije oojaatita danite, okai kou dani maija kei bagee kedaa maakodo mana akaije; kou ko dimi peu kita bagee, daana maakodo gai maida make wouga kidaa.

⁹Kodeja okei wo te ekowamakaitai, okeija dimi beu kodo ko me utoma ewaida jadoutai kouja, kei wija maija jadota danite.

¹⁰Kodeja aki ki anija katopita mana kodo epeepite jakimakeetege; daana anija kei tita ijee maija nadootege; daana anija juma doodoo mana ko; daana anija maakodo gai ko, daana anija kegepa animakita ko, daana anija ipa dimi ko, daana anija bo wemakai kodo ko;

¹¹daana Antiochia makiida ma, Ikonium makiida ma, Listera makiida ma peepu natijake gaagaa tita manaido utoma. Peepu umina natita kodeja utoma agijo duba make Tuhanja napipikajawita.

¹²Beu maa, Keristus Jesus duba Ugatameepa dijo doune bagee utoma me ka peepu etaitai.

¹³Kodeja peu bagee ma, puja euke-tai ma euga abuma peu ke-wo to, me wo ekeenijawii, daana okei kede wo keenidaa tijake.

¹⁴Kodeja aki ki katopita mana duba bo wemakai, aki epaapa tijawita manaida kodaa, katopita bagee ega-tojake.

¹⁵Daana aki jokaida gaa kodaa make jimubeu kapogeije epi kita kouja, kou ko Keristus Jesus maakodo gaidaiga ajii tai mana epi kaawija mana kodo.

¹⁶Ugata mana utoma Ugatame gokobaki tijawiidaiga awijake epaago kodo, me etopija ma, peu ewaida jaawija ma, peu enaana tijawija ma, daana enaa takaa wo topija ma.

¹⁷Ugatame jakei te-tai kidi boko duwadoke te-tita, enaa kei tija agijo utoma maida epeepi timakita.