Read Galela 2 TIMOTIUS 4 Bible Online

2 TIMOTIUS 4 - Galela bible

2 TIMOTIUS 4

¹Ugatame ma Keristus Jesus ma pekaida, ija totaija ma bokataija ma boko petaitagi kidi; okai ewaa kaitagi kouja, daana jakimakita maki maida make kouja, ani umina bida peu kidi katii,

²mana kodo wude-wo. Enaa gaa kipa maija, peu gaa kipa maija, wo kei te to. Peu agijo ewaida awii. Kegei-kegei etai. Kegepa animakijake wo etopigoo to tai.

³Putuuda kaita kouja, me ka enaa mana te juwe taitai, kodeja gapa kebajawijake okei kede utoopa gaijaidaiga topiine tijake kuduu wo kotuu atii.

⁴Tijake maakodo mana jamo kigi atijake kuba-mote mana wo juwaawe.

⁵Kodeja aki ki utoma agijo duba bo wemakai; gaagaa gaduwagoo; ajii mana wude-tai kidi kei tija agijo kei tai; kaadokijawita mana kodo boko duwajawii.

⁶Ani ki emo nauwijawiineegai; ani uwii putuuda kaineega.

⁷Maakodo gaida ani epeepite jape motimakeetega; nadokijawita mana kodo boko duwajaweetega; maakodo gai ko jakimakeetega.

⁸Ito kou enaa agijo kei tai petege naamakijake topi; putuuda gaa kodaa boko peta-tai me Tuhan kidaa nawejawiitagi; daana ani to ko beu, kodeja okai ewaa kaitagiida ei egata bagee utoma.

⁹Aneepa meine egaagaa tai.

¹⁰Demas najaikidokita, kii makiida ei gamakijake, tijake okai Tesalonika uwita; Kereskes kidi Galatia uwita; daana Titus kidi Dalmatia uwita.

¹¹Lukas to aneepa topi. Markus ebukigojake aneepa oomei, kei tai agijo okai naadadai enaa kouja.

¹²Ani Tichikus kidi Epesus makiida ebadikumita.

¹³Aki mepe ko, ani Teroas makiida Karpus owaapa jokoutouga kagaba jaikita kodo naadoke-mei, daana kapogeije kei utoma, epauto ko kado kapogeije utoma kede.

¹⁴Pute kei te-tai me Iskandar kidi umina peepu nateemegi; Tuhan kidaa okaija kei tita dani abu japaitagi.

¹⁵Okaapa make aki akaato munii, iniija mana okai umina akaije nitita kouja.

¹⁶Ani edoga kidi mana amo etita gaa kodaa me idaana ma naatou beu, kodeja utoma najaikidokii. Kou mana kodo okei maida te dokidoke tai.

¹⁷Kodeja Tuhan kidaa naatojake bida naawii, ajii mana ani maida ugo uwidoke te-tita, daana ojaa bagee utoma juwe-tita; tijake ego jago jina ebe duba make ani pipikadoke tai.

¹⁸Tuhan kidaa peu agijo utoma maida make napipikajawiitagi, daana okaija ka epaawado ka jakimakita makiida wadoujo ke-tijake namadagajawiitagi. Ajiipi okai ipuwe kii kidi imo to togoo. Amin.

¹⁹Periska ma Akila ma kojáá tou naaetii, daana Onesiporus uguwo maija.

²⁰Erastus Korintus makiida tootegi, daana Teropimus Miletus makijo didi ka ani ejaikidokii.

²¹Oo uwa beu gaa meete egaagaa tai. Eubulus ma, Pudens ma, Linus ma, Kelaudia ma, enakeneka bagee utoma kojáá tou kateegai.

²²Kou danite akija roh kodo Tuhan kidaa kaatou to. Ugatameja jikoo bokouto kijaduwajawii.