Read Galela TITUS 2 Bible Online

TITUS 2 - Galela bible

TITUS 2

¹Kodeja aki ki maakodo bokouto ma utuutu ka mana kodo meido etopai.

²Me iboudo okei akaato domakai, ipouje, dougai mougai, daana maakodo gai ma, ipa dimi ma, bo wemakai ma, boko duwajawii.

³Jagamaadama maija jimubeu ijee motii; me te ewegai, utaadijo maida dimi tadu taatii; kodeja enaa agijo pika-tai bagee kidaa tai;

⁴jokaagaa ka jagamoudo kedaa jamaane ma jokaane ma ipa ega-tijake etope-tita.

⁵Dougai mougai, jikoo, okeija uguwo epeepi domakai, dimi enaa, jamaaneepa juwidoke, Ugatameja mana ewidogidoke na kojoka.

⁶Kou danite maija jame jokaagaido akaato domakai mana eti-menii.

⁷Utoma takaida aki kidaa enaa mana komuga menii; daana akija etopai manaida ko doodoo ma, ipoujeidaiga to.

⁸Pidou pidou mana kodo pidou pidou wegai, te widogija mana kodo, ikii ma akaije bagee kede niwidogai mana beu kijake ego ga-tita.

⁹Ejakimakita bageido okeija ka iboudo ejuwidoke te-tijake eti-menii; tijake utoma takaida juma dege-dege ete-tita kei te-wo, akaije te tijake;

¹⁰oma beu, kodeja enanauto mana boko duwajawii, utoma takaida ajii bokouto nijaduwa-tai me Ugatame kidi mana kodo diiti awe-tita.

¹¹Ugatameja jikoo bokouto utoma bagee ajii ti-meniine tijake ewaa tapa kita kouja,

¹²nitopeete ko, inii dijo beebuudo ma, makiida ka utoopa ijee ma, jaikidokijake kii makiida kiija ipouje kidi ma, enanaa ma, dijo dou ma takaida ume-wo.

¹³Agakato ka kotopijawita dimi kodo doutoote, kou ko e ibo te ibo Ugatameja ajiipi bokouto ewaa kaita mana, daana ajii bokouto nijaduwa-tai me Jesus Keristus ewaa kaitagiida.

¹⁴Inii maida make akaato ekegajawita me kidi, peu utoma maida make nipipikajawe-tita, okai kidaa bagee ewitogi-motiine, enaa agijo kei taine enanaa bagee.

¹⁵Kei manaido eti-menii; bida peu kidi etopai ma, kegei-kegei ma etai. Meena ma daba te kajaikai.