Read Galela IBERANI 1 Bible Online

IBERANI 1 - Galela bible

IBERANI 1

¹Kii takaida kou takaida tika kodaa Ugatame gokobaki tijawiidaiga wegai tita bagee ka ebeidaiga inii aijaaneepa mana oowegai;

²ito wiwitiida gaa Jokame kidiidaiga mana nijawegai, utoma agijo utoma gowa-tijake boko jaduwajawita me kidi; kii kidiidaiga maija okai makiida ugajawita.

³Ugatameja ajiipi agijo kodo okai wawakii wawakii; okai Ugatameja ijeida ajá kodo. Okaija bida mana kodaa utoma agijo utoma pigu atii; peu agijo witogai mana kei timakijake e ibo te ibo etikaato gebo animakai, monika to-taida.

⁴Tijake jaetigo-tai bagee ma ko ibo ejaikita danite, eka kidi maija okeija ekaido ma ko ibo.

⁵Kawi ka ki jaetigo-tai meepa Ugatameja etii ko: Aki ki ani Joka didé; Ani ito naago kawowijawii. Juwa: Ani ki Nakame kijake okai ki ani Joka kai.

⁶Tijake kigeena ma, ibouto ida kidi makiida emejawita gaa kodaa kei teete mana: Ugatame jaetigo-tai bagee utoma migaakobe etai enaa.

⁷Jaetigo-tai bagee kede maida make kei teete mana ko: Jaetigo-tai bagee kede ukija ejaikai, Daana jakei te-tai bagee kede bodija wii kodo.

⁸Kodeja jokame kidi maida make kei teete mana ko: Akija jegeenaka animakaida, ei, Ugatame, imo kidi to togoo; Akija jakimakita makiida ka kopa kou ko Enanauto boko peta-tai ka kodo.

⁹Aki ki maakodo bokouto ei gajake peu agijo be gai; Okai kouja Ugatame, kii ke akija Ugatame kidaa Aki ma bagee kede ma ko ideide jeboo kodo wo katuumijawita.

¹⁰Daana: Aki ki, ei Tuhan, edoga pukipaki maki kabo makijawita; Epa kabuudo kodo akija gane ka kei tita agijoudo kodo;

¹¹Kei ke peu kaitai kodeja aki ki imo kidi to togoo. Kei utoma kagaba danite doga kaitai,

¹²Tijake eba danite aki donimakaitage; Okei iginikiniki tidaa taitai, Kodeja aki ki kii kidi tou to; Daana akija wagi ko momogiida ko beu.

¹³Kodeja kawi ka ki jaetigo-tai meepa kii dani etii: Anija etikaato gebo animakai, Be kagata bagee akija bado mijouto tagi atijake Bado makijaida kaaejaikaitaida to.

¹⁴Beu, mee? kei utoma kei te-tai roh kodo, ajii bokouto goutai bagee kede eedade-tijake ebadikumita.