Read Galela IBERANI 12 Bible Online

IBERANI 12 - Galela bible

IBERANI 12

¹Okai kouja mana wegai bagee wedaba jabai dani bukaa nibobimakai kouja, udo kugouto gakita neemigimakai, daana gadi neetiine ka peu agijo gakita maija, tijake bo wemakijake inii jumaapa nijajaikita akaatiga teeteida kodaa akaatiga neetai;

²Jesus kidi peka wo wagimakijake, iniija maakodo gai kodo epauto ma boko duwajawii ma kidi; okai jumaapa jamakita ideide maida make ko pija boko kodo gaduwagota, ego mana kodo aadaba tijawijake; tijake Ugatameja agakato dani ibo animakaida etikaato gebo animakijake-topi.

³Kii kidi egaadodowei, peu bagee ka akaije ootijake didi gaduwagota me kidi, tijake kegepa didi juwa, odoo juwa, te neekai.

⁴Ikii ke peu agijo ma akaije kodo emo uwii beu topa;

⁵daana jokaane etija danite kitita mana kodo ikii adaku tipa juwa; kou ko: Ei, ani joka, Tuhanja katopai mana kodo aadaba te tai, Daana beu kati-toojogo ko, odoo te kai;

⁶Tuhanja ipa egata me kidi bida peu etopai kouja, Daana ebukaine jokaane me gakita kidi godijai etai.

⁷Ikii gaduwagoo tai manaido kou ko kitopai manaido danite gaduwagoo; Ugatame jokaane danite kikei teete kou ko; kawi ka ki joka kidi nakame etopai beu me kidi?

⁸Kou manaida utoma bagee oogo-motii kouja, kitopai beu ki-toojogo ko ikii mogai joka, daana joka didé ko beu.

⁹Inii makiida iniitaima ka nitopijake inii ibo ejaikai; beu, mee? inii umina beu kai peu roh bokouto Iniitai kidi ibo ejaikijake ajii tai.

¹⁰Okeija ka gaijaidaiga mijo gaa nitopei tita; kodeja Tuhan kidaa inii epaago ke-tijake, okaija ka jimubeu bokouto kodo inii didee go-mote-tita.

¹¹Kei teete gaa kodo nitopai mana kou ko ideide mana ko beu, kodeja gaagaa; kodeja wadoutouga maakodo bokouto uta kodo jagojawii, koudaiga etopita bagee kede duba.

¹²Okai kouja dajawita gane kodo wado kaga atii; daana pigi-pigi kagu kou ko bida awii.

¹³Tijake ikiija bado maida make doodoo ita jawadii, wajage kodo jukagi motigi te te-tijake, kodeja beu ke-tita.

¹⁴Utoma bagee ma kojáá akaate taine ekowa-motii, daana jimubeu bokouto kodo juma doodoo; jimubeu bokouto beuda ko me idaana ma Tuhan kidi te edomakaitagi.

¹⁵Me idaana ma Ugatameja jikoo bokouto maida make jamo togaa na kojoka gai; tijake nokii dimi epauto pakamijake gaagaa wedaba ewaa awijake me wedaba jimu anijawii.

¹⁶Juwa, me idaana utoopa wo uwe na kojoka; utoopa dimi juwa, Esau kidi danite, naija agijo mijo kidi maida make ibouto ida motija ibo agijo kodo kaa tita.

¹⁷Ikii epi, okai wadoutouga mobu bokouto kodo gowaine jato ekonita; okai tedemai takaa dou beu kouja, jege ma umina uba-uba kodeja.

¹⁸Ikii ke winiki etija ka bagoudaapa mei beu kouja, bodija wii ma, duguwo ma, wanee kabu ma, jajaukija ma,

¹⁹mitoopi mana peijo ma, daana mana wuu ma, tijake juwita bagee kedaa mana wado ti niwegai ediimita.

²⁰Etimakita mana kodo okei te juwimake kouja, kou ko, bo wiijago kipi maija bago kodo winiki etipi, mogo ka wage-jamo.

²¹Dota agijo kodo wegai peu kouja Musaja mana kodo, „Ani weda umina totome pigi-pigi.”

²²Kodeja ikii ke Sion bagoudaapa mei, daana ajii bokouto jago Ugatameja makijo kodoopa, kou ko epaawado ka Jerusalim kodo, daana jaetigo-tai bagee te gakimake kodoopa;

²³daana ibouto daniido uguupuguu, eka ko epaawado ebijata; daana Ugatame kidiipa, utoma bagee boko peta-tai kidi; daana enaa bagee utoma roh kodo boko duwajawita daniido kedeepa;

²⁴daana Jesus kidiipa, ija ka togijawita mana kodo jupiida ka me kidi, daana gapi atita emo kodoopa, Habilja emo kodo ma ko enaa mana wega-tai ka kodo.

²⁵Gai, mana wegaate me kidi te ekonai. Makiida make mana etijake okei ekonijake ko petii beu ki-toojogo ko, inii umina kodo petii te timake, epaawado make eneete me kidi inii ekonitoojogo ko.

²⁶Okai kou gaa kodaa okaija mana wuu kodaa maki pigii tai; kodeja ito kou okaija nijatogijawita mana ko: Kigeena ma maki to ko beu kodeja epa maija begoo pigii tijawiita.

²⁷Kii mana ki, „kigeena ma to” mana kodaa begoo tija agijoudo wo wajagijawii mana kodo, kou ko ugajawita agijoudo kodo, tijake begoo te timake agijoudo kodo tou to.

²⁸Okai kouja nigajaweege dimi kodo neegai, inii begoo te tija ka jakimakita makiida go-motii kouja, tijake Ugatameja juma dege-dege nitija takaidaiga migaakobe neetiwei, weda ma ibo ejaikijake.

²⁹Inii ipuwe me kidi nojawija bodija kouja.