Read Galela IBERANI 2 Bible Online

IBERANI 2 - Galela bible

IBERANI 2

¹Okai kouja inii juwita mana kodo umina kidi wado gai-gai beu kai peu, mana kodo maida make jamo taadaa na kojoka.

²Jaetigo-tai bagee ka wegata mana kodo pigu tijake dijo beebu ma ekonai ma bagee kede pidou pidou abu pa-toojogo ko

³inii ke kawe dani tijake petii tija? ajii mana peijo kodo inii aadaba ti-toojogo ko. Edoga kidi Tuhan kidaa wegajake ejuwita bagee kedaa ineepa epaapa nitijawii;

⁴Ugatame kidaa maija mana kodo boko jaduwajawii, dou beu agijo ma, ego takuu-takuu agijo ma, Rohulkudus ojaa menija agijoudo ka ma, okai kidaa gaijaidaiga.

⁵Wado ka ewaa kaita ka makiida kou ko Ugatame jaetigo-tai bagee maida jajaikai ko beu, inii mana wegaate ka kodo.

⁶Me idaana ka wegata mana ko: Me tuma kii ke magijo? Aki ega-tou kidi, Juwa, me joka kidi, aki emunai kou ko.

⁷Jaetigo-tai bagee ma ko mijo gaa daba ejaikita; Ajiipi ma, ibo ka ma kobeigido jamakita, Daana akija gane ka kei tita agijo maida ejaikita.

⁸Utoma agijo utoma okaija bado mijo tagi jaatita. Utoma agijo utoma tagi jaatijake ko, ena ma jaikai beu tijake utoma tagi jaatii to. Ito kou utoma agijo utoma okai mijo tagi jaatii inii dou beu.

⁹Kodeja inii Jesus kidi edou, okai mijo gaa kodaa jaetigo-tai bagee ma ko daba ejaikijake ajiipi ma ibo ka ma kobeigido jamakita, bokai kodo didi gaduwajake kouja; Ugatameja jikoo bokoutoudaiga me jokaija maida make jaboka-tijake.

¹⁰Ugatame jokaane wedaba ajiipi duba emejawiine tijake, ajii tai migougu jamakita me kidi didi gaduwaidaiga boko jaduwajawii ko enaa; Ugatame maida make, daana okaimaidaiga utoma agijo ewaa kai.

¹¹Jimubeu bokouto jaduwajawii kidi ma, jimubeu eewita kede ma epauto ko ena to. Okai kouja okaija kenekaane eebatai ko ego beu;

¹²kei teete mana: Anija kenekaaneepa akeeka kaaeti-meniita; Me kotuuda kodaa muta katuwaita.

¹³Daana kigeena ma: Ani okai maida dimi ekotopijawiita. Daana kigeena ma: Dodou, ani ki ma, ani jokaane ma, Ugatameja naimita kede.

¹⁴Okai kouja jokaido kede ena tine kouja, okai maija okai kou ijee kodo motii; okai bokajake ko, bokai maida make bida jago kidi beu awe-tita, kii ke Teege kidi;

¹⁵tijake okeija umi-tou woja kodaa bokai weda dimi ka ejakimakita bagee kede epipikajawe-tita.

¹⁶Maakidi, okai jaetigo-tai bagee kede eedadai ko beu, kodeja Ibrahim mijo ekebata bagee kede.

¹⁷Okai kouja, utoma agijo utoma maida make okaija kenekaane ma ena dani kidoke tai beu kai peu, Ugatameja kei tai agijo maida make okai ipa dimi jago ma, enanauto ma Ibo Imam ke-tita, meido ka peu kodo maida make dagi jaduwajawe-tita.

¹⁸Okai na gaado mana kodo didi gaduwata kouja, egaado tita bagee kede okai eedadimake.