Read Galela IBERANI 6 Bible Online

IBERANI 6 - Galela bible

IBERANI 6

¹Okai kouja, Keristus maida make epauto manaido kou neejaikijake mana wo wegajake boko duwajawii. Kabo ko makigoo to te neetai, kou ko bokajawii manaido tedemai mana kodo; Ugatame maakodo egai mana kodo;

²baptis tai mana kodo ma, me maida gane jamakii mana kodo ma, bokata bagee anigoutai mana kodo ma, imo to togoo peu kai mana kodo ma.

³Ugatame enaa gapi ko, inii mana wo wegai.

⁴Me kigeena ko awe kadee timakijake, daana epaawado make mijo niimita agijo igi wagijake, daana Rohulkudus gomotijake,

⁵daana Ugatameja mana enaa kodo ma, wado ka wagiida ka bida agijo ma igi jakijake,

⁶tijake wouga kipi ko, wado etedemijawii ko kaga, akaato maida make Ugatame Joka kidi pija boko maida edajawii kouja, daana ewaidaiga ego jamejawii.

⁷Edi ko kigeena wageena maki maida wejake maki duba igadaa tijake maki kodaa kei te-tai bagee maida make naija agijo japakamijawijake ko Ugatameja mobu bokouto gou.

⁸Kodeja maki kodaa dogo ma bo ma podomijawi-toojogo ko, epa beu kijake peu kugouto dokeenii, tijake momogiida ko bodija kiumai.

⁹Inii kou dani wegai kodeja, ikii maida make, ei, noogei dideemaido, inii enaa mana epaapa timakai, ajii tai doodouga kodo.

¹⁰Ugatame kidi utoopa ko beu kojoka; ikiija ekowata agijo kodo adaku ti kijataitagi, daana ikii jimubeu bagee kede okai maida make ipa egajake eedadita kodo, ikii kei teete kodo danite.

¹¹Inii ide ikii me gakita kou dani ekowa-motii, kotopijawita dimi kodo epaapa timakaine tijake, kii kidi momogiida to.

¹²Ikii ena peu te kijake okeija komouga kinita kodo jaepei, okei kegepa mijaanimakijake maakodo gaidaiga Ugatameja jatogijawita manaido gowajawita bagee kede.

¹³Ugatameja Ibrahimpa mana jatogijawita gaa, baita makiine tijake okai wado ka me beu kouja, akaato maida baita makita;

¹⁴kei teete mana: Maakidi ani mobu bokouto kaduwajawijake me wedaba kaawiita, etita.

¹⁵Kou dani tijake Ibrahim kojáá peu kidi doutojake jatogijawita mana kodo gowajawii.

¹⁶Akaato ma ko ibo maida me ka baita makeigai; daana mana duwajawiine baita makijake ko akaije mana muumai.

¹⁷Ugatameja dimi kodo akabetoke te tija kodo okai jatogijawita mana gowaja bagee kede emuwakaine tijake, okai baita wado makijawii;

¹⁸akabetoke te tija mana muto wija maida make, daana Ugatameja kou maida puja ti niukimake, inii umina epaapa timake-tita, inii mobu káine tijake okita bagee kede, ineepa nijamakita ka kotopijawii dimi jakimakaine tijake.

¹⁹Kii ke iniija dimi mana ka tito kodo, pigu tijake tou to, daana bedee duwajawita kagaba kodo woujo kita,

²⁰Jesus migougu nijamakijake woujo kitaida kodaa, imo to togoo ka Ibo Imam kijake, Malkisedik jaida epeepeidaiga.