Read Galela IBERANI 9 Bible Online

IBERANI 9 - Galela bible

IBERANI 9

¹Edoga jatogijawita mana kou ko dijo douja manaido ewaa, daana makiida ka dáida kodo.

²Kagaba owaa epeepi timakita kouja; edoga owaa duba kodo lampu makijawe-taida ma, pejageida ma, makijawita ka roti kodo ma; kii ke Dáida ebatita.

³Tijake wijaago bedee duwajawita kodo wouto kodaa Dá Uminaida.

⁴Kii maida unu enaa agijo jojaida mas ka ebijata, daana togijawita mana awijaida kodo mas ka apumimakita; kou duba mas tapuja Manna awita ma, Harunja imugi pakatita kopa kodo ma, togijawita mana ebijata mogo kapo wija kodo ma.

⁵Kou wadouto agakato dani Karub wija kodaa ipa ejaikaida mijo watita. Kei manaido ena tiga ena tiga ito kou inii te wegamake.

⁶Kei agijoudo epeepi timakijake ko, imam kede edoga kuguuda uwigoo to te-tai, okeija kei tija agijoudo kei taine tijake.

⁷Kodeja wijaago kuguuda kodaa ibo imam kidi to taun ena duba kigeena to, emo tagu ko beu, akaato maida make, daana meido ka peu kei tita agijoudo maida make ekega-meniine tijake.

⁸Kou dani tijake Rohulkudus kidaa ewaida nijaawii ko, Da Uminaida uwe-tai ita ko wadii beu topa, edoga kugu kodo toja gaa kodaa.

⁹Ito kii wagi kidi ebijaabija mana kodo. Okai kou manaidaiga kodaa ekega-menii agijoudo ma, jo-menii agijoudo ma menetai; meneete me kidi dimi kodo boko te jaduwamake mana kodo.

¹⁰Naija agijo mana ma, witoge-tai mana ma, ebaidaiga ka manaido kodo jadokijawita, boko duwajawii putuuda to.

¹¹Kodeja Keristus kidi wadaato ka enaa ka meitai manaido maida make Ibo Imam kidi meta. Euga ibo ma enaa ma owaa maidaiga kodaa, me ka gane ka kei tai beu tita, kii makiida kiija ko beu no te,

¹²kou maidaiga kigeena to eutoma maida make Dá Uminaida wadoujo kita, kamigi emo ma, sapi joka emo ma ko beu, kodeja okai kidaa emo kodo dokijake imo kidi to togoo nipipikajawii.

¹³Kamigi emo ma, jame sapi emo ma, uka sapi gako ma peu bagee maida gapi atijake ebaidaiga jimubeu awi-toojogo ko,

¹⁴umina kodo Keristus emo kodaa ikiija dimi kodo bokata kei tai agijo maida make jimubeu keewija, ajii bokouto jago Ugatame kidi jakei taine tijake; okai imo to togoo Roh kodoudaiga akaato jimubeu kidi Ugatameepa ekegata me kidi.

¹⁵Okai kouja okai ija ka togijawita mana kodo jupiida ka me kidi, manaa-tita bagee kede imo to togoo jatogijawita agijo kodo gowajawe-tita; edoga ka togijawita manaida peu kei tita agijoudo maida make epipikajawii kouja, bokai manaidaiga kodaa.

¹⁶Bokai mana kou ko wo kei tija, bokai mana godata me kidi boka-toojogo to.

¹⁷Bokai mana godata me kidi bokajake to wo kei tija; godata me kidi ija toja gaa kodaa te kei timakija.

¹⁸Kojoka edoga ka togijawita mana kodo maija emo tagu kodo boko duwajawii beu tita.

¹⁹Musaja dijo douja ka e mana te mana kodo meido utoma kedeepa eti-menijake ko, okai sapi emo ma, kamigi emo ma motijake, daana uwo ma, dege ijo ma, zupa ka ma kapogeije kodo ma meido utoma gapi atii;

²⁰kei teete mana, „Kii ke Ugatameja kitita ka kijatogijawita mana ka emo kodo.”

²¹Kou dani tijake kagaba owaa kodo ma, kei te-tai agijoudo utoma emo gapi atita.

²²Maakidi, Musaja dijo douja manaidaiga kodaa wija wido to jaikijake utoma agijo emo ka witogijawii, daana emo tuumai beuda ko peu agijo ipa te ejaikija.

²³Okai kouja epaawado ka agijoudo ebijaabija kodo kou dani tijake ko witogita, kodeja epaawado ka agijoudo kodo euga enaa ka ekega-menii agijo ka witogija.

²⁴Me gane ka kei tita Dáida kodaa, mana puki kodo ebijaabija kodo no te, Keristus wadoujo kai beu kouja, kodeja epaawado puki kodaa wadoujo kai, inii maida make Ugatame jumaapa nijake-tita.

²⁵Kigi inoudo akaato ekegajawii ko beu, ibo imam kidi taun gakita dáida kodaa wadoujo kigoo tita danite, okai kidaa emo ma ko beu;

²⁶kou dani naako maki kabo makitaida kodaa make ko kigi inoudo didi gaduwagoo ti-toja. Kodeja okai kigeena eutoma maida make wiwitiida gaa kodaa akaato ekegajawii, peu agijo igajawiine tijake.

²⁷Me jokaija kigeena ko boka-tijake boko jaduwajawita danite, daana kou wadouto boko japetajawii,

²⁸okai kou danite Keristus kidi kigeena me wedaba ka peudo jadoke-tijake ekegajawita; tijake wijaagouda ewaa kaitagi, peu maida make ko beu, kodeja edouto-tai bagee kede ajii etimeniine tijake.