Read Galela JAKUB 2 Bible Online

JAKUB 2 - Galela bible

JAKUB 2

¹Ei, noogeimaido, iniija Tuhan Jesus Keristus ajiipi bokouto jago me kidi maakodo egajake me ebepeka te ewitokai.

²Mas kagane ma, kagaba enauto ma makita me idaana ikiija sembahjang taine kotuu tei titaida woujo kipi, daana peu kagaba makita me idaana maija woujo kipi;

³tijake ikiija ka enaa kagaba jago kidiipa eteete mana ko, „Jakai enaida animakidodou,” tijake daba ka me kidiipa eteete mana, „Kouja joonidou, juwa, jakai ani badoopa animakidou,” etipa ko,

⁴beu, mee? ikiija ka kegepa duba kii ke kii, kou ko kou, gajake peu dimiidaiga boko duwajawii.

⁵Juwidowei, ei, noogei dideemaido, makiida ka daba bagee kede maakodo gai kodo tonawi kodo Ugatame ewitokai beu, mee? daana ei egai bageepa jatogijawita ka jakimakita makiida gowajawe-tijake.

⁶Kodeja ikii daba bagee kede daba ejaikeetega. Beu, mee? tonawi bagee kedaa peepu kitei tita, daana pika-taida ganeuto kigou tita.

⁷Beu, mee? okei kedaa ajiipi jago eka kodo ewidogeigai, keebatai ka kodo.

⁸Ugatameja jakimakita makiida ka ijee kodo ugata mana duba ka kodo, kou ko: Aki watija ka bagee aki akaato danite ipa egai mana kodo, ikii dijo dopa ko, ikii enaa kei tai.

⁹Kodeja ikii me ebepeka ewitokipa ko, ikii peu kei tai; dijo douja mana kodaa kegei-kegei kitijake dijo beebu bagee kidomakai.

¹⁰Meija dijo douja mana kodo dijo domakipi, kodeja mana ena to dijo beebu tipi, okai utoma kodo dijo beebu.

¹¹„Mogai te tai” enita me kidaa „Me te wagii” mana maija enimakita. Aki mogai te tijake me wagipe, aki ki dijo douja mana kodo dijo beebu me keege.

¹²Kou dani mana wegai, daana kou dani kei tai, me epipikajawija mana kodaa boko kijapetai bagee kede danite.

¹³Me ipa egai beu tita me kidi ipa te egajake boko japetai kouja; ipa kodaa boko petai mana kodo wo etigadokii.

¹⁴Ei, noogeimaido, me idaana ka „Ani ki maakodo gai” mana wegajake kei tai beu kipi, epaago, mee? Kou ka maakodo gai kodaa ajii ti-menija, mee?

¹⁵Jame keneka juwa, jagamo keneka juwa, agijo beu kijake naago gakita ka naija agijo te tiki tijake

¹⁶ikii jupi ka me idaana ka eteete mana, „Kojáá uwii; enaa kijake mobu kai,” etijake má maida make gai peu agijo menii beu ki-toojogo, epaago, mee?

¹⁷Kou dani maakodo gai kodo kei tai agijo beu ki-toojogo ko bokata.

¹⁸Me idaana ka wegai ko, „Aki ki maakodo gai, ani ki kei tai. Akija maakodo gai kodo kei tai beuda namuwakai, daana anija kei taidaiga anija maakodo gai kodo kamuwakaipiga.”

¹⁹Ugatame kidi Ena to aki maakodo gai. Enaa kodo. Enija maija maakodo gajake totome pigi-pigi tai.

²⁰Aki gaine, mee? ei, dimi beu me kidi, maakodo gai kodo kei tai agijo beuda ko epa beu.

²¹Beu, mee? iniija aijame Ibrahim kidi kei tai agijo maidaiga maa egajawita, jokame Isak kidi jo-menijaida eekegajawijake ko.

²²Kojoka gai, maakodo gai kodo okaija kei tai agijo ma enaimo kijake okaija kei tai agijo maidaiga maakodo gai kodo boko duwajawii.

²³Kou dani ugata mana muto kodo kobadoke tita; kou ko: Ibrahim kidi Ugatame maakodo egajake maakodo bokouto kodo jagajawita. Tijake okai Ugatameja ogeme eebatita.

²⁴Kojoka aki gai, me ka kei tai agijo maidaiga maa egajawita, daana maakodo gajake to ko beu.

²⁵Kou dani maija mogai jago jagamo Rahab kodo kei tai agijo maida make maa egajawita, beu, mee? okai gabo doonaa teete bagee kede ebukijake joko ka itaiga ebadikumita gaa.

²⁶Má jato kodo dimi mana beuda bokata kodo danite, kou dani maija maakodo gai kodo kei tai agijo beuda bokata.