Read Galela JAKUB 4 Bible Online

JAKUB 4 - Galela bible

JAKUB 4

¹Jape epauto ko kaija make? Daana ikii jupi akaije kodo epauto ko magijo? Beu, mee? ikii me ijeida kibigi dimi epautouda, ikiija tineija duba akaije akaate.

²Ikii kibigi gajake go-motii beu. Ikii me wagijake digi edokai kodeja motii beu. Ikii akawage ma, akaije ma, kodeja motii beu, ikii ediimai beu kouja.

³Ikii ediimijake motii beu, peudaiga ediimai kouja, ikiija kibigi dimi wo kei tijawiine tijake.

⁴Ei, ikii mogai tei tita bagee, ikii ewo, mee? makiida ma akooge-akooge te-tai ko Ugatame ma jape kodo. Okai kouja, meija makiida ma akooge taine gapi okai Ugatame ma jape kita.

⁵Wogidaa gaaga, mee? ugata mana kodo: Inii duba nijaawita ka Roh kodaa kogaa umina nigai.

⁶Okai jikoo bokouto abuma nijadegijawii. Okai kouja ugata mana kodo: Ugatame kidi ibo puga bagee ma akaije, kodeja mijo kegepa jago bagee jikoo bokouto jaduwajawii.

⁷Ikii akaato Ugatameepa ekegajawii, kodeja Teege kidi akaije ootai, tijake Teege kidi ikeepa make okiitagi.

⁸Ugatameepa kapauto kai, daana okai maija ikeepa kaitagi. Ikiija ka gane jimubeu awii, ei, ikii peu kei tei tita bagee; kegepa kodo witogai, ei, dimi takaida bagee.

⁹Gaagaa tiga tijake jege ma, jiijii ma tai. Ikiija kijai kodo jiijii ma akapaka tai, daana ideide kodo gaagaa ma akapaka.

¹⁰Tuhan jumaapa ikii akaato mijo awii, tijake okai kidaa ibo keewiitagi.

¹¹Ei, noogeimaido, akawidoge te tai. Meija kenekame ewidogipi ma, peu eewipi ma, okai dijo douja mana kodo ewidogijake peu awii. Aki dijo douja mana kodo peu awipe, aki dijo do-tai me ko beu, kodeja dijo douja mana kodo boko peta-tai me.

¹²Ena to kidi dijo douja mana kodo niimijake boko peta-tai me kidi, kii ke epipikajawii juwa, peu eewii juwa, bida jago kidi. Kojoka aki ki meime? aki watija ka me kidi boko petajawii ko.

¹³Ei, ikii kii dani mana wegai bagee: „Inii aweetaa wijaume kou maki katouda uwijake taun ena umidokiitage. Inii muna wegajake bago kaitage.”

¹⁴Aweetaa ewaa kaita mana ikii ewo kodeja. Ikiija ka umi-tou kou magijo na ko? Kou ko nogaa dani bukaa, mijo gaa to ewaa kijake igadoke tai.

¹⁵Kodeja ikiija ka wegaja mana ko: „Ugatame enaa gapi, inii ume-wo tijake kii kei taitage, kou kei taitage,” wegaja.

¹⁶Kodeja ikiija ka ibo puga dimi kodo kobidoke tai. Kou dani kobidoke tai ko peu.

¹⁷Okai kou dani me idaana enaa kei tai agijo epi kodeja te kei tipi, okai peu kei teete.