Read Galela 1 PETERUS 1 Bible Online

1 PETERUS 1 - Galela bible

1 PETERUS 1

¹Ani ki Peterus kidi, Jesus Keristus eti-awita me kidi, wudepapa tikumita ka akiume-ume te-tai bageepa kijamakii; Pontus dokoo ma, Galatia dokoo ma, Kapadokia dokoo ma, Asia dokoo ma, Betinia dokoo ma ka.

²Iniitai Ugatameja tika kodaa kiwitokijake Roh kodaa jimubeu kitijawita, Jesus Keristus kidi ejuwe-tai maida make, daana okaija emo gapii maida make ko. Jikoo bokouto ma, muka-muka bokouto ma, ikeepa abuma ke-wado kijatijawii.

³Iniija Tuhan Jesus Keristus Nakame Ugatame kidi muta etuwai; okaija ka ibo ka ipa bokouto kodaa ajii ka kotopijawii dimi maida inii kigi wijaagouda nipamakita, Jesus Keristus kidi bokata bagee jupi make anigota manaidaiga.

⁴Peu te kija gowai agijo maida make, anaani beu kodo, denakogi te tija, epaawado kijamakijake topa.

⁵Ikii Ugatameja bida agijo ka kimadagajawita, maakodo gaidaiga, ajii tai doodouga, wiwitiida gaa ewaida ke-tijake epeepi timakita.

⁶Okai kou duba ikii ideide, ikii ito kou mijo gaa na ki to kii gaado kou gaado maida gaagaa ki-toojogo maija.

⁷Ikiija ka maakodo gai kodo kigaado tita ko mas ma ko umina wo etige ka puku agijo. (Mas ko bodija jodojake anaanibeu kai kodeja peu kija agijo.) Ikiija maakodo gai kodo kigaado tita ko muta etuwai ma, ajiipi ma, ibo ejaikai ma mejawe-tita, Jesus Keristus ewaida kaitagiida.

⁸Ikii edou beu gaa kodaa ikii ei egai me kidi; ikii ito kou edou beu kodeja ikii maakodo egajake ideide etai, wegai ma peu umina ka ideide kodaa.

⁹Ikiija maakodo gai kodo momogiida ko ikii go-motii; kou ko dimi mana ajii tai kodo.

¹⁰Ikii maida kaita ka jikoo bokouto douja dojawita bagee kede ajii bokouto kodo epeepite ubajake igi jakii.

¹¹Kawo ka wagi, daana wake dani ka wagi kodo Keristusja Roh kodaa okei duba ewaida aweete okei gaado gaado, Keristus gaduwai tiga tijake nemouga ajiipi agijo ewaa kai douja dojawijake.

¹²Okeepa ewaida jaawita okei kede ipuwe manaido kei tijawii beu kodeja ikii kede maida make mana kodo kijakei tijawita, ajii mana kijawudijawita bagee ka ewaida kijaawita manaido ko, epaawado make mijo niimita ka Rohulkudus maidaiga; kei manaido jaetigo-tai bagee kede gaine kodaa.

¹³Okai kouja ikii juma doodoo tai; ikii ga-tou to tai; Jesus Keristus ewaida kaitagiida gaa ikeepa kaita ka jikoo bokouto kodo umina dimi kotopijawii.

¹⁴Epi juwe te-tai joka dani bukaa ikii mijaato ewoudaiga utoopa ijee manaido wado te kei tai.

¹⁵Kodeja mana kitita me kidi jimubeu kidi danite, ikii maija ikiija umi-tou ijeida utoma jimubeu kiwei.

¹⁶Kapogeije ebijata kouja: Ikii jimubeu kiwei, ani ki jimubeu me kouja.

¹⁷Me ebepeka te ewitokijake kei tita kei tita epeepeidaiga boko japeta-tai kidi ikiija ka Iniitai eebati-toojogo ko, ikiija ka duwa jaweida gaa kodo weda ma ume-wo.

¹⁸Ikii epi kouja, ikiija aijaane ka epa beu ka mijo kijamakii-makii manaido maida make keeda-motita, peu kija ageja ka ko beu, perak juwa, mas juwa,

¹⁹kodeja Keristusja agakato dani emo ka, anaanibeu jimubeu domba-joka ka kodo danite.

²⁰Maki kabo makii beu gaa kodaa boko duwajawita kodeja ito wiwitiida gaa kodaa ikii maida make ewaida awita.

²¹Okai maidaiga ikii Ugatame maakodo egai. Bokata bagee jupi make Ugatame eenigojawijake ajiipi agijo menii, ikiija maakodo gai kodo ma, dimi kotopijawii kodo ma Ugatame maida tadu ate-tijake.

²²Ikii maakodo mana kodo juwidoke tijake dimi mana jimubeu awijake enakeneka bagee kede kegepa doodoudaiga ipa egai kouja, kegepa puki ka ikii kede ipa akaga tiwei.

²³Ikii kigi wijaago kipamakita kouja, peu kija ijoo ka ko beu, kodeja peu te kija ijoo ka, kou ko Ugatameja imo to togoo ka ajii mana kodaa.

²⁴Me jokaija baa wagi dani bukaa kouja, Daana okaija ajiipi agijo kodo pi kodo dani bukaa. Baa wagi kodo denadaa tai, daana pi kodo juwidaa,

²⁵Kodeja Tuhanja mana kodo tou to imo kidi to togoo. Kou ko ikeepa kijawudita ka ajii mana kodo.