Read Galela 1 PETERUS 4 Bible Online

1 PETERUS 4 - Galela bible

1 PETERUS 4

¹Keristus kidi me má jatouga didi gaduwata kouja, ikii kede maija kou dimi kodaa akaato dougai mougai timakai; má jatouga didi gaduwata me kidi peu jamo jaikai kouja.

²Wado ka umii wogi tou wogi kodaa me ijeidaiga ume-wo ko beu tijake, kodeja Ugatameja dimiidaiga.

³Ojaa bagee ka kei te-tai manaido ikii kei tei tita kodo ikiija umita wagiida ko tiki; kikija epauto, kibigi dimi, utaadijo uneune, utoopa wo uwe, uneune uwo to no-no, nokii ka utoopa migaakobe tai.

⁴Okei ego takuu takuu ikii okei ma enaimo dimi beu kidi utoopa wo uwe beu kouja, tijake kiwidogai.

⁵Kodeja ija tota bagee ma, bokata bagee ma boko peta-tijake epeepi timakita me kidiipa okei amo etiitai.

⁶Okai kouja ajii mana kodo bokata bageepa maija jawudita, me má jatouga danite boko japeta-tijake kodeja, Ugatame danite rohdaiga ajii te-tita.

⁷Utoma agijo momogiida kaineega; okai kouja pidou pidou tijake sembahjang taine doutou.

⁸Umina epauto mana ko, ikii kede ipa akaga tai; ipa kodaa peu agijo wedaba mijaapumimakai kouja.

⁹Ikii kede umidokii akaate tai, kitigi motigi beudaiga.

¹⁰Ikii me gakita ojaa kinijawita kodo danite ikii kede akaadade tai, Ugatameja jikoo bokouto kii mana kou mana jajaki-tou bagee danite.

¹¹Mana wegai me kidi Ugatameja mana wegaja danite wegai; me eedade-tai me kidi Ugatameja meniijawita bidaidaiga kei tai; utoma agijo utoma dubaiga Ugatame kidi ajiipi agijo go-mote-tita, Jesus Keristus maidaiga. Ajiipi bokouto ma, bida bokouto ma okai ipuwe kii kidi imo to togoo. Amin.

¹²Ei, ani ei kigata bagee, bodijaiga kigaado tai mana kodo gootoki te tai, dou beu agijo ewaa kidoke jaijo.

¹³Kodeja ikii Keristus ma enaimo didi oogaduwai kouja ideide tai; okaija ajiipi ewaida kaitagiida maija ikii ideide umina te-tita.

¹⁴Ikii Keristusja eka maida make kiwidogi-toojogo, ikii ideide no! Ugatameja ajiipi jago Roh kodo ikii maida kouja.

¹⁵Kodeja ikii jupi me idaana ma me wagii juwa, oma juwa, peu kei te-tai juwa, kii tabe-tabe kou tabe-tabe juwa kouja didi te gaduwai.

¹⁶Kodeja me idaana Keristen ka me kouja ddi gaduwa-toojogo ko ego te gai, kodeja kou eka maida make Ugatame muta etuwai.

¹⁷Ugatameja uguwo kodo boko petai putu keega, daana inii maida go-moti-toojogo ko, Ugatameja ajii mana kodo ejakimakai beu bagee momogiida ko kawe dani taitai?

¹⁸Daana enaa bagee kede gaagaa ma ajii etijawi-toojogo ko, te juwe ma, peu ma bagee ko kawe dani taitai?

¹⁹Okai kouja Ugatameja dimiidaiga didi gaduwai bagee kede enaa agijo kei tijake dimi mana kodo enanauto Ugajawitame kidiipa ekegajawii.