Read Galela 1 PETERUS 5 Bible Online

1 PETERUS 5 - Galela bible

1 PETERUS 5

¹Ikii jupi ka maakodo gai uguupuguu douto-tai bagee ani kiti-kinii, ani na douto-tai me kouja, daana Keristusja didi gaduwata kodo edota me, daana ewaa kaita ka ajiipi kodo ani didee motiita me.

²Ugatameja domba imouto ikii jupi emunai, me ka tapa-tapa kitijakle ko beu, kodeja Ugatameja dimiidaiga ide ka; bago kaine tijake ko beu, kodeja kegepa puki ka.

³Daana ikeepa kijaekegajawita bagee maida bida ko beu kodeja domba imo kodo komuga menii.

⁴Tijake domba ooto-tai ka Ibo kidi ewaida kaitagiida, ikii te denaja ka ajiipi petege go-motiita.

⁵Okai kou dani maija, ikii jokaagaa daniido iboudo kedeepa ejuwidoke tai, tijake ikii utoma mijo kegepa awijake akaadade tai; Ugatame kidi kegepa ibo bagee ma akaije kouja, kodeja mijo kegepa jago bagee jikoo bokouto jaduwajawii.

⁶Kojoka Ugatameja bida gane duba akaato daba awii, okaija kei tija wagiida ibo kaawe-tita.

⁷Ikiija ka gaagaa utoma okai maida ekegajawii, okai dimi kiga-tou to kouja.

⁸Ga-tojake douto-tai; ikii ma jape Teege kidi singa dani bukaa ebe aa tijake mana peijo to tina, me etaganaine ubana teete.

⁹Maakodo gai ko bo wemakijake akaije ootai; uwoje makije ikii ma enakeneka bagee kede okai kou dani didi gaduwai kodo gajake.

¹⁰Ikii mijo gaa didi gaduwagojake jikoo bokouto jago Ugatame kidaa, Keristus duba imo to togoo ajiipi maida mana kitita kidi, okai kidaa boko kijaduwajawijake bo kiwemakai, daana bida keewijake kabo kijamakii.

¹¹Bida bokouto okai ipuwe kii kidi imo to togoo. Amin.

¹²Silwanus kidi enanauto noogei egaaga me kidi maidaiga kii pini kapogeije ani kijaebijaaga, kou ko Ugatameja jikoo bokouto mana puki kodo jawegajake kiti-kiniine tijake; kou duba bo wemakai.

¹³Babil makiida ka kodo, ikii danite ewitokita kodo, kojáá tou kiteega, daana ani joka Markus kidi maija.

¹⁴Ipa manaidaiga unu akajume tai. Keristus duba ka bagee utoma muka-muka gou.