Read Galela 2 PETERUS 3 Bible Online

2 PETERUS 3 - Galela bible

2 PETERUS 3

¹Ei, noogeimaido, kii ke wijaago kapogeije ani kijaebijai; okejai wija duba ikiija ka jimubeu dimi kodo ga-kinijake mabiki kitaine;

²tikauwa ka jimubeu ka gokobaki tijawiidaiga wegai tita bagee ka wegata mana kodo ikii ga-tijake, daana ajii bokouto nijaduwa-tai me Tuhan kidi mana kodo, eti-awita bagee kede maidaiga kinita.

³Edoga kidi, gai, wiwitiida gaa kodaa widoge-widoge te-tai bagee kede meitai, okei kede kibigi dimi kei te-wo bagee kede;

⁴kei teete mana, „Meitagi mana togijawita kodo ko kaija? Iniija aijaane muumaane bokata gaa make ito to utuuja utoma agijo utoma kii kidi tou to, maki kabo makitaida make ko,” wegai.

⁵Kou mana kodo okei dimi ka aadaba tijawii, kou ko, Ugatameja mana maida make epa kabuudo tika kodaa tota, daana maki kodo uwo duba make, daana uwo maidaiga;

⁶kou maidaiga okai kou wagiida ka makiida kou ko uwo pegemijake peu kita.

⁷Okai kou manaida kodaa ito gaa ka epa ma maki ma bodija maida make jaikita, boko petai putuuda, daana peu bagee peu kai wagiida maida make jakimakita.

⁸Kii mana kidi adaku te tai, ei, noogeimaido, Tuhan pekaida agapeena ko seribu taun dani bukaa, daana seribu taun kou ko agapeena dani bukaa.

⁹Tuhan kidi okaija nijatogijawita mana kodo ipeipe beu, me ka ipeipe kodo gaigai kodo danite, kodeja ikii maida make kojáá peu kidi kegepa mijaanimakai; tijake me idaana ma peu kai ide beu, kodeja me utoma tedemai to ide.

¹⁰Kodeja Tuhanja putu naago kodo oma me dani bukaa pagi taita; tijake epa kabuudo kodo ibo geewu ma igadaa taitai; epauto agijoudo bodija ka jugeedaa taitai; daana makiida ma, kou maida kei tita agijoudo utoma wei kogi taitai.

¹¹Kei agijoudo utoma kou dani igadaa taitai kouja ikii kawe dani ka begee kija, jimubeu ma, dijo dou ma.

¹²Ugatameja putu naago kodo doutou ma, egaagaa ma tijaweete; epa kabuudo bodija jookogajake peu kai naago kodo, daana epauto agijoudo bodija ka jugeedaa tai.

¹³Kodeja okaija ka nijatogijawita mana kodo epeepeidaiga inii ke ija ka epa ma maki ma doutope, maakodo bokouto to-taida.

¹⁴Okai kouja, ei, ani ei kigata bagee, ikii kei manaido doutopa kouja, ikii jimubeu anaani beu kodo muka-mula maida kidomake-tijake umina ekowa-motii.

¹⁵Daana iniija Tuhan kidi kegepa mijaanimakita kidi ajii bokouto mejawii mana kodo gai; iniija noogei didé Paulus kidi kapogeije kijaebijaategi danite, dimi boko menita kodo epeepeidaiga.

¹⁶Okaija ka kapogeije utoma duba kou mana maida make ebijai. Kou duba gai kaga manaido topai; ewo ma, bo wemakai beu ma bagee kede mana kodo akabetoke tijawii, joko ka ugata mana maija danite, okei kede peu aweete.

¹⁷Okai kouja, ei, noogeimaido, ewaa kai beu gaa kiteega kouja, gadodou; dijo beebu bagee ka puja manaida monoo kitijake pigu titaida make gootidoke na kojoka.

¹⁸Kodeja iniija Tuhan Jesus Keristus, ajii bokouto nijaduwa-tai me kidi jikoo bokouto kodo epi kaine maduwa-wo. Ajiipi bokouto okai ipuwe ito maija, kii kidi imo to togoo. Amin.