Read Galela 1 JAHJA 1 Bible Online

1 JAHJA 1 - Galela bible

1 JAHJA 1

¹Okai kou epautouda make tota ka ko, kou ko inii juweetege ka ko, inii peka dojake peka wagimakeetege ka ko, inii gane ka jakeetege ka ko, kou ko ajii mana kodo;

²ajii bokouto kou ko ewaa tapa awita kouja, daana inii edomakai, daana mana jawegai, daana mana kiti-kinii, ajii tai imo to togoo mana kodo, Nakameepa tota ka kodo, daana ineepa nimuwakita kodo.

³Inii dou ma juwii ma teetege mana kodo inii ikeepa kiti-kinii, ikii ke inii ma dimi akagadime tijawe-tita; daana iniija dimi akagadime tijawii kou ko Nakame kidi ma, daana Jokame Jesus Keristus kidi ma enaimo.

⁴Inii kou mana kodo ebijamakai ko, iniija ideide dimi kodo boko duwajawe-tita.

⁵Kou dou inii okaapa make juwijake ikeepa kiti-kinii mana muto kodo; kou ko, Ugatame aweida kidi, daana okai duba bunita ena ma beu.

⁶Inii okai ma ena dimi akagadime mana wegape ko, kodeja bunita duba uwina tipe ko, inii puja, daana maakodo mana kei tijawii beu.

⁷Kodeja inii aweidaiga uwina ti-toojogo, okai na aweida topi danite, inii kede ena dimi akagadime tijawii, daana Jokame Jesus kidi emo kodaa iniija peudo utoma nijawitogikumii.

⁸Inii peu beu mana wega-toojogo inii akaato kadee makeete, daana maakodo mana inii duba beu topa.

⁹Kou danite iniija peudo inii oda-meni-toojogo ko, okai enanauto ma, pidou pidou ma, tijake iniija peudo ipa nijaikijake peu agijo utoma maida make nijawitogikumii.

¹⁰Inii peu agijo kei tai beu mana wega-toojogo, inii Ugatame puja ejaikai, daana okaija mana inii duba beu topa.