Read Galela 1 JAHJA 2 Bible Online

1 JAHJA 2 - Galela bible

1 JAHJA 2

¹Ei, ani jokaane dabaido, ani kii mana kijaebijamakai, ikii peu te kei te tita; kodeja kou danite me idaana peu kei ti-toojogo maakodo bokouto jago me Jesus Keristus kidaa Nakameepa mana nijawega-tai.

²Okai ki iniija peudo maida make nijawagita tijake dagi nijaduwajawii, daana iniija ka peudo to ko beu, kodeja makiida maki utoma ka maija.

³Okai kou dani tijake inii epi inii egamakai, okeija enimakita manaido dijo jado-toojogo ko.

⁴Me idaana ka „Ani okai ki egamakai” mana wegapi, kodeja okaija enimakita mana dijo beebu tipi, okai puja, daana maakodo bokouto okai duba beu.

⁵Kodeja meija okaija mana dijo domakipi, okai duba Ugatame ei egai dimi kodo boko duwajawita. Okai kou dani tijake inii okai duba tope mana kodo inii epaapa timakai.

⁶Ani okai duba topa mana wegaja me kidaa, Keristus na umi-tou tita kodo danite ume-wo tija.

⁷Ei, anija ei kigata bageido, ani ija ka kitimakai mana kijaebijai ko beu, kodeja tota ka kitimakita mana, edoga kidi make ka; tota ka kitimakita mana kou ko ikii juweetega ka mana kodo.

⁸Kodeja ani ija ka kitimakai mana kijaebijai, okai duba ma ikii duba ma maakodo mana kodo; bunita kou ko igadoke tita kouja, daana awe puki kodo ganimakeete.

⁹Meija „Ani awe tapa” mana wegajake kenekame be egapi, ito kou maija bunita duba topi.

¹⁰Kenekame ipa egaja me kidi awe tapa tou, daana okai koudaiga duwaa-duwaa mana beu.

¹¹Kodeja kenekame be egata me kidi bunita duba tojake bunita tapaiga to uwina tai, daana uwijaida ewo, okaija peka ko bunita kodaa bunita awijake ko.

¹²Ani kapogeije kijaebijai, ani jokaane dabaido, okai maida make ikiija ka peudo ipa kijaikita kouja.

¹³Ani kapogeije kijaebijai, ei, nakaaneido, epautouda make tota me kidi ikii epi kouja. Ani kapogeije kijaebijai, ei, jokaagaido, ikii peu bokouto kidi daba ejaikita kouja.

¹⁴Ani kijaebijai, ei, jokaido, ikii Iniitai kidi epi kouja. Ani kijaebijai, ei, nakaaneido, okai epautouda make tota me kidi ikii epi kouja. Ani kijaebijai, ei, jokaagaido, ikii bida jago kouja, daana Ugatameja mana ikii duba tou to, daana peu bokouto kidi ikii daba ejaikeetega.

¹⁵Makiida kiija juwa, makiida kaido juwa, ei te egai. Me idaana makiida kiija ei ega-toojogo, Iniitai ei egai dimi kou ko okai duba beu topa.

¹⁶Makiida ka ko, kou ko me ijeida ka kibigi dimi ma, peka ka kibigi dimi ma, ibo dimiidaiga ume-wo ma epauto Iniitaipa make ko beu, kodeja epauto makiidaapa make ko.

¹⁷Maki ki igadoke taita, daana makiida ka kibigi dimi maija; kodeja Ugatameja dimi kei te-tai me kidi tou to kii kidi imo to togoo.

¹⁸Ei, jokaido, ito wiwitiida keega; daana Keristus ma akaije bokouto kidi meitagi mana kii juweetega kodo danite, ito kou maija Keristus ma akaije wedaba topai; okai kouja inii epi, wiwitiida keega kodo.

¹⁹Okei ineepa make podomai, kodeja inii jato ka ko beu; okei inii jato ka naako, inii ma enaimo bo wemaki-toja. Kodeja okei podomeetegai, inii jato ka kede ke beu kodo ewaa tapa ke-tita.

²⁰Kodeja ikii ke jimubeu bokouto jago kidaa Roh kijatuumijawita, daana ikii utoma agijo epi.

²¹Ani mana kijaebijai kou ko, ikii maakodo bokouto kodo ewo kouja ko beu, kodeja ikii epi kouja, daana puja mana ena ma epauto ko maakodo mana maida make ko beu ikii epi kouja.

²²Meija puja me kidi? kodeja Jesus ki Keristus kidi mana beu puga me kidi to. Nakame ma Jokame ma beu puga me kidi ki Keristus ma akaije bokouto kidi.

²³Meija Jokame kidi beu puga etipi, Nakame maija beuda. Meija Jokame okai ipuwe awipi, Nakame maija ewaa.

²⁴Ikii edoga kidaa make juweetega mana kodo ikii duba tojawii. Ikii edoga kidaa make juweetega mana kodo ikii duba topa ko, ikii Jokame kidi duba tou, daana Nakame kidi duba maija.

²⁵Daana kou dou nijatogijawita mana kodo; kou ko, ajii tai imo to togoo kodo.

²⁶Puja kiukaine bagee maida make ani kii dani mana kijaebijai.

²⁷Okaija ka Roh kijatuumijawita kodo ikii duba tou; daana me ka kitopai gai peu ko beu; Rh kijatuumijawita kodo utoma agijo utoma kitopai kouja; daana kou ko maakodo mana, puja beu, kitopita kodo danite ko; okai duba tou to.

²⁸Ito kou, ei, ani jokaaneido, okai duba tou to, okai ewaa kaitagiida inii kegepa tipinimakijake ego te ga-tita, okaija meitagiida.

²⁹Okai maakodo bokouto jago me kidi ikii epi keetigo ko, enaa agijo kei te-tai bagee utoma epauto okaapa make mana kodo epaapa timakai.