Read Galela EWAIDA 12 Bible Online

EWAIDA 12 - Galela bible

EWAIDA 12

¹Epa maida dou beu agijo ibo ewaa keega. Kou ko jagamo idaana meuka ka etonimakita, daana agoo kodo bado mijouto, daana dagiimouda ijapu wija ma gaati jago petege kobeigido jamakijawita.

²Okai modaago kijake joka didi kodo emeeme tita, paine tijake.

³Tijake dou beu agijo ena ma epa maida ewaa kai; kou ko emo dani matokaato ka peka jago jina peguuto, migo pituwaago, daana pija gapa gaatijago, tijake dagiimouda petege pituwaago.

⁴Puga ka epa maida ka ijapu widaago kabuuda mijo gojawii, tijake makiida mijo pi atii. Matokaato ka peka jago jina kodaa paine jagamo kodo jumaapa joonidoke tai; jagamo kodo pajake joka kidi etaganaine tijake.

⁵Tijake jame joka idaana pamakai; utoma bagee pute kopa ka ejakimakaitagi me kidi; jokame kidi Ugatameepa wado ebukimotita, daana okaija jegeenaka animakaidaapa.

⁶Tijake jagamo kodo me beuda okii; okai kouda kodaa Ugatameja to-taida epeepi jatijawita, agapi seribu dua ratus enam puluh emune-tijake.

⁷Tijake epaawado jape makidaa, kou ko Michail ma jaetigo-tai bagee ma ka matokaato ka peka jago jina kodo ma jape; matokaato ka peka jago jina kodo ma okaija jaetigo-tai kede ma jape makii,

⁸kodeja jina kodo daba kijake epaawado okaija to-taida beu kai.

⁹Tijake jina peguuto kodo mijo pi etita, kou ko tota ka ugenija, Teege ma enija ma eebatita kodo; makiida maki utoma puja eukita kodo, okai makiida mijo pi etita, okaija ka jaetigo-tai bagee ma enaimo.

¹⁰Tijake epaawado ani ibo mana wuu juwii, kei teete mana, „Ito kou ajii tai kodo ma, bida agijo ma, iniija Ugatameja jakimakita makiida ma, okaija Keristus ka boko duwajawii mana kodo ma medaa keega; iniikeneka bagee ewidoge-tai kidi mijo pi etita kouja, wanee agapi iniija Ugatame jumaapa ewidogigoo tei tita kidi.

¹¹Domba-Joka emo ka ma, okeija ka wega-tai mana ka ma daba ejaikita; okeija dimi mana jakimakai beu kouja, bokaida kipa maija.

¹²Okai kouja, gaida gaida tiwei! ei, epaawado ma, kou duba ka topaido ma. Kodeja peu kojoka no! ei, maki ma, maikai ma, Teege emoge umina kidi ikeepa mijo meta kouja, putu pini keega kodo gajake.”

¹³Jina peguuto kodo makiida pi atita kodo gadoke tijake, jame joka epamakita jagamo kodo eepena tai.

¹⁴Kodeja jagamo kodoopa tuba peguuto aa uu wija menijawita ugenija kidiipa make me beuda patii te-tita, emunijaida kodaa, kigeena ma, kigi wija ma, ebeebe ma wagi kodo.

¹⁵Ugenija kidaa ebe duba make uwo onee dani waino tijawii, jagamo kodo nemouto; uwo degijake eigajawiine tijake.

¹⁶Kodeja maki kodaa jagamo kodo eedadai; maki kodaa ebe aa tijake jina ka ene duba make podomijawita onee kodo gaawii.

¹⁷Tijake jina kodaa jagamo kodo emoge egajake okaija joko ka jokaane ma jape makiine uwii, Ugatameja enimakita manaido dijo do-tai bagee kede, daana Jesusja mana wega-tai bagee.

¹⁸Tijake maikai watija í maida joonidoke tai.