Read Galela EWAIDA 13 Bible Online

EWAIDA 13 - Galela bible

EWAIDA 13

¹Tijake ego jago jina idaana maikai duba make podomai ani dou, pija gapa gaatijago ma, migo pituwaago ma, daana petege gaatijago pija gapa maida, daana juwii peu eka dagiimouda ugajawita.

²Ani dota ka jina kodo harimau kumbang dani bukaa, daana bo ko beruang dani; ebe ko singa ebe dani. Kii kidiipa matokaato ka peka jago jina peguuto kodaa bida agijo menii, daana jegeenaka animakaida, daana bida bokouto jaduwajawii.

³Migo ena ko jati ibo bokaine dani, kodeja bokaine dani ka jati kodo oodoke tai, daana makiida maki utoma kodaa jina kodo ego takuu-takuu timakijake eepei to.

⁴Me kedaa matokaato ka peka jago jina peguuto kodo migaakobe etai, matokaato ka peka jago jina kodaa jina kodo bida bokouto jaduwajawita kouja; okei jina kodo migaakobe etijake kei teete mana, „Meime jina kodo ma ena dani? daana meija akaije ootija?”

⁵Jina kodo ebeidaiga ibo peu mana goda-tijake menijawita, daana agoo wija ma mepiija boko duwajawe-tijake bida agijo menijawita.

⁶Ugatame ewidogai mana godaine tijake ebe aa tijawita, okaija eka ma to-taida ma peu mana wegaate, daana epaawado to-tai bagee maija.

⁷Daana jimubeu bagee ma jape make-tita bida menijake daba ejaikai. Tijake me epa gakita, me uguwo gakita, mana gimo gimouja, me tuma tumaija maida bida bokouto jaduwajawita.

⁸Tijake makiida maki utoma migaakobe etaitai, maki kabo makii beu gaa wagimakita domba-Joka ka ajii kapogeije duba eka ebijamakai beu daniido kede.

⁹Meija gapa jago kipi juwii.

¹⁰Bida peu kidi ejakimakai bagee kede bida peu ejakimakitaida uwii; kataana ka duwaja bagee kede kataana ka duwadaa taitai. Okai kou manaida jimubeu bagee ka kegepa mijaanimakijake maakodo gamakai.

¹¹Joko ka ego jago jina makiidaapa make podomai ani dou; kii ke pija gapa wijaago domba joka dani bukaa, daana mana wuu ko matokaato ka peka jago jina peguuto ka mana wuu dani bukaa.

¹²Edoga ka jina ka bida agijo okai jumaapa boko jaduwajawii, daana edoga ka jinaapa migaakobe ete-tijake makiida maki utoma bida peu etimakita, jati ka bokaine tijake oodoke tita me kidiipa.

¹³Ibo ka dou beu agijoudo kei tijawii; me pekaida bodija epa maida make makiida mijo mejawii.

¹⁴Daana jina jumaapa dou beu agijoudo kei tita kouja, makiida ka bagee puja eukai; daana kataana ka duwajake ija kita jina dani ebijaabija agijo kei tijawii etimakai.

¹⁵Tijake jina ebijaabija kodoopa ebe puu menii, jina ebijaabija kodo mana wega-tita, daana jina ebijaabija kodoopa migaakobe etai beu bagee wagimake-tita.

¹⁶Dedaana utoma bagee, mijo beu ibo beu, tonawi beu daba beu, ojaa beu ejakimakita beu, etikaato ganeida juwa, utugu jato juwa tegee do-tijake jaebijata.

¹⁷Tijake edai juwa, kaa tai juwa, me idaana ma beu, kodeja jina kodaa tegee edotaido to, kou ko jina eka juwa, okaija eka gake juwa.

¹⁸Kouja dimi boko kodo. Gamakija bagee ka jina eka gake kodo gakijawii, me ka gakija kouja. Gaki-toojogo ko enam ratus puluh enam.