Read Galela EWAIDA 14 Bible Online

EWAIDA 14 - Galela bible

EWAIDA 14

¹Ani dojake domba-Joka kidi Sion dimiida joonidoke ti-toojogo edou, daana okai ma enaimo okei me ida seratus empat puluh empat ribu kede, okaaka ma Nakame eka ma utugu maida ebijata kede.

²Daana mana wuu epaawado make juwii, uwo wedaba gee dani bukaa, daana gekamugu ibo dani bukaa; ani juwita ka mana wuu kodo tekeuga ewija bagee ka tekeuga eweete dani bukaa.

³Tijake okei ija ka ebetaataa mana jegeenaka animakaida jumaapa ebetaataa tai, daana ebe puu jago ida wii ma, iboudo ma jumaapa. Me idaana ma kou ebetaataa mana kodo te topimakija, kodeja makiidaapa make eeda-motita ida seratus empat puluh empat ribu kede to.

⁴Keido kei jagamo ma akaato jimu anijawii beu daniido, okei jagamo ma enaida tou beu kouja. keido kei domba-Joka uwijaida eepe-tai bagee; okei me jupi make ookajawita uta eeda-motita, Ugatame ma, domba-Joka ma maida make.

⁵Okeija ebe maida puja mana jadomakai beu, okei anaani beu kouja.

⁶Tijake joko ka jaetigo-tai me ani edou, epa ma maki ma bedeidaiga kagabina te-tai, imo to togoo ka ajii mana jago, makiida maki utomaapa japitoke-tita, kou ko e tuma te tuma, e bagee te bagee, e mana te mana, e uguwo te uguwo kedeepa.

⁷Okai ibo mana wuu teete mana, „Ugatame weda egajake ibo ejaikai, okaija boko petai putuuda keega kouja; epa ma maki ma maikai ma uwo momaato ma ugajawita me kidiipa migaakobe etai.”

⁸Joko ka jaetigo-tai me maija, kii ke wijaago kidi, eepei, ibo mana wuu teete mana, „Bogomeenii no! bogomeenii no! Babil peguuto kodo, kikija epauto ka utaadijo kodo utoma bagee no-tijake menijawita kodo.

⁹Tijake idaana ma, kii ke jaetigo-tai widaago kidi okejai wija eepei, ibo mana wuu teete mana, „Me idaana ka jina kodo juwa, ebijaabija kodo juwa, migaakobe eti-toojogo ko, daana gane maida juwa, utugu maida juwa tegee edo-toojogo ko,

¹⁰kii kidi wadaato enege uwo naitagi, kou ko Ugatameja emoge dimi kodo, takabaka beu tijake emoge uwaawe duba wagaawita, daana domba-Joka pekaida ma, jimubeu jaetigo-tai pekaida ma, bodija ka ma nodogi peu nogaa ka ma gaduwagoo to.

¹¹Okeija ka gaduwagoo ka nakagi kodo wado pudu pudu to tigoo kii kidi imo to togoo; wanee agapi te duwajake gaduwagoo to, jina kodo ma ebijaabija ma migaakobe etai bagee kede, daana okaaka tegee edota bagee kede.

¹²Okai kou manaida kodaa jimubeu bagee utoma kegepa mijaanimakai; Ugatameja enimakita mana jakimakai, daana Jesus maakodo egai dimi jakimakai.

¹³Epa maida make mana wuu ani juwii, eneete mana, „Ebijadou: Ito make wado bokaitai bagee ideide no! Tuhan duba bokai daniido. Maa kou,” Roh ka mana, „Okeija kei tai umina kodo maida make ee duwa-tita, okeija kei tita agijoudo utoma eepei kouja.”

¹⁴Ani dojake, tá pokade, daana kou maida me joka dani bukaa animaki-toojogo, mas petege dagiimouda kobeigido jamakita, daana ganeida emuu kopóó maawai doki-toojogo.

¹⁵Tijake joko ka jaetigo-tai me Ugatameja owaapa make podomai, ibo mana kodaa tá maida animakita ka kidiipa wuu eteete mana, „Kopóó maawai mijaawijake uta duwai, uta duwai putuuda keega kouja, makiida ka duwaja kodo awamidaa tita kouja.”

¹⁶Tijake tá maida animakita ka kidaa kopóó maawai mijaawijake makiida ka uta duwakumii.

¹⁷Tijake joko ka jaetigo-tai kidaa Ugatameja owaa epaawado make podomai, emuu kopóó maawai dokijake.

¹⁸Tijake joko ka jaetigo-tai kidi jo-menijaida make podomai, kii ke bodija maida bida jago kidi, daana emuu kopóó maawai jago kidiipa ibo mana wuu kodaa eteete mana, „Kopóó maawai mijaawijake makiida ka buda uta jukuwuku kotuu timakai, uta kodo awamidaa kouja.”

¹⁹Tijake jaetigo-tai kidaa makiida kopóó maawai mijaawijake makiida ka utaido kotuu timakijake Ugatameja emoge dimi kodo ibo jugejake tijaida emigimakai.

²⁰Tijake ibo maki tapouda uta jugejake tijaida daimijawita, tijake uta daimijaida make emo wamo tita, kuda ebeida buda jato ko, woja pini ka kabo seribu enam ratus tijawita.